تفاصيل الزمان اللي لها وجهٍ بدون عيون
خذتني لين صار الصمت يهواني وانا أحبه

سألت الناس من حولي لماذا يابشر تبكون؟
وانا عيني بكت معكم ولا أدري عن السبّة

تجاوبني عقولٍ تجربتها بين كاف ونون
يخاف الآدمي ربّه ولكن ماخشى ربّه

انا والليل والساعة نعيش بعالمٍ مجنون
على دقاتها ليلي خذاني للسهر جبّة

بعد ماكنت عاهدني وعاهدته قبل ماأكون
وميزان المعاني عن قشوره شاقني لُبّه

رحلت ورحلتي طالت وقارب رحلتي مفتون
مجاديفي كسرها الموج والقارب دخل غبّة

ياصوت الحزن لك صمتٍ مخيف وخاتمتك طعون
تجيني ذكرياتك واحفظك وتعود متشبّه

بياضك في سوادك ماترك لي في عيوني لون
وجرحك واقعٍ تعجز يدين الصبر في طبّه

تلوّح بالوداع وقبل ماترحل عزفت ألحون
وقيثارك ضلوع الصدر والجمهور متنبّه

ياليتك قبل ماترحل رحمت الخافق المسجون
على لآل السراب اشوف طيفك والهوى هبّه

غيوم الحرف بلّل فيضها وجه الثرى والكون
هنا قطرة هنا قطرة تزيد وغيمها صبّه

روايات السنين وماضي التاريخ عن فرعون
تجدد واقعٍ فرعون لاحبّه ولا سبّه