رشيقه وصفها مثل الحرير وناعـم الديبـاج=حنونة صوت والمعنى حديث اللون والصوره
على خطوه مراكبها عواصف والطريق أمواج=تعّدت يوم في ليلـه قمرهـا ماكمـل نـوره
تغني لي بها الدنيا مفاتيـح وقفـل وأفـراج=وأنا واقف ورى روض الزمان أطالع زهوره
أحاول كيف أقربها وأنا هايب من الاحـراج=مكان البعد والقربى جهاته حيـل محـذوره
لو أروي بالظما عمري عروقه نبضها محتاج=من أنفاس الغلا لوهي بوادر حـب مخبـوره
أبيها للفضـا أول كواكـب وآخـر الابـراج=توديني لها عين وعليهـا العيـن مأمـوره
أبيها للوفـا وجـهٍ بـلا زينـه ولا مكيـاج=تبودر بالحيا ماله قنـاع ولا رمـى شـوره
أبيها للشعر بيـت وأبيهـا للغـرام سيـاج=وأبيها كل مابيها حمـام العشـق وطيـوره
أبيها للخيال .. تكون واقع والغـلا وهـاج=آبحرق بالغلا روحي آلين الأمـس شعـوره
أبيها كان للمسرى تبيني والمـدى معـراج=نجومي بالسما وأرضي من الاشواق ممطوره
ولوهي ماتجي صدفه بلا مدخل ولا مخـراج=أبا أرسمها وأسميها شظايا العشق والثـوره