على طاري العادات في سراة عبيدة عند واحد من اخوياي
في العصر نتقهوى و قلطونا على حاجة وقت العصر يسمونها وصل المهم اعرف وقت غدا و عشاء و فطور
اما وصل اول مرة تمر علي
عندنا اذا مع العصير حطوا العشاء الأولين طبعا يسمونه هجور

المهم قلطنا على الوصل عاد ناسي اسم الوجبه بالضبط عام 30 او 31
عليها سمن حار و القرص نفسه الممرود حار
المهم ابو خويي ودم القرص في السمن و هو حار
و مدها لي في ثمي يبي يكلني تقول يكل اصغر عياله

انا ما انتبهت له اللقمه قدام خشتي و الشايب كان محتزم بالجنبيه و شكله يروع قال اقبل و حرارة اللقمة يا دافع البلا
جيت باخذها بيدي و ابردها
قال اقبل يعني افتح ثمك و خويي يشر لي بعيونه
المهم فتحت ثمي و اكلني اللقمه و الله لا يعيدها من لقمه
ضو نار موقده
شفتوا افلام كرتون البس و الفار اذا كلى شي حار يطلع من ثمه ضو نفس النظام
احس اني تنين اخضر الي تطلع اللهبه من ثمه

و كله عشان اقبل

#ذكريات- لا-تنسى