غروب شمس… اداء المبدع ناصر السيحاني: http://youtu.be/LxZUHPDyUqA

غروب شمس ووقفة اثنين واطلال =يتذكرون أيام سن الطفوله*
يتذكرون اشلون سن الصبا زال =ووشلون راحت هالسنين بسهوله
صدفه بلاميعاد وقفوا على جال =ذاك المكان اللي يدورون حوله
ذاك المكان اللي حفظ حب الاطفال =كبروا وكبر الحب ثم ارجعوله*
لوكان هو معرس وهي عند رجال =الحب الاول صعب شي (ن) يزوله
جاء بيتكلم وألتفت يمها وطاااال =صمت (ن) رهيب ولا لقى مايقوله
وده يقول الحال هذي هي الحال =تشرح ألم قلبه تفاصيل زوله
وده يقول ولا لقى شي ينقال = الا دموع (ن) حادرات (ن) عجوله
وهي وااقفه بين التراجع والاقبال = متردده والقلب تقرع طبوله*
ماغير تمسح دمعها باسفل الشال = ومن الخجل كن الحروف مغيوله*
في قلبها حكيٍ(ن) من سنين يجتال = وعيونها عما تكنه حكوا له
تقول يبقى الحب رمز(ن) للاجيال = لو كل منا عايش (ن) وسط دوله*
ويبقى الوفاء لو ماتت احلام وامال = ويبقى للأول داخل القلب صوله*
والمشكله ماكل شي على البال = تقدر تقوله بأي موقف تقوله*
بعض السكوت ابلغ من حروف وامثال =يمكن يوصّل شي صعب وصوله
واقسى عتاب الصمت والدمع لاسال = وابلغ حكي نظرات عين( ن) خجوله
واقفت وهي تحمل من الهم غربال = تمشي بخطوات (ن ) ثقال(ن) كسوله*
أقفت وهو واقف على ذيك الاطلال = يتذكر ايام الصبا والطفوله