رسالة للشاعر بن هضبان
تدانت حروف القافية واعلنت لذعان
لشيخ عريب شاعر حفظته لذهان
تميّز بنهجه وارتقى قمة التعبير
وصاغ المعاني واصبحت شهرته عنوان
تباهت به القيفان والفخر به يزداد
ومن صار في صفه في المعركة كسبان
ولو تسأل العالم عن الشاعر النحرير
بلا شك قالوا شاعر الجيل بن هضبان
ألا يا زعيم القاف يا بو زميع الشيخ
سلامي على شخصك وربعك بلا حسبان
وبعد السلام أهدي لك الشكر والتقدير
من أعماق قلب صادق الود والعرفان
وهذي رسالة نصها واضح مكشوف
تبي رأي شاعر له مكانه مع الشيخان
نصتك القوافي يا سليل الكرم والطيب
ونعمين بالحرّث وتشهد لهم لزمان
وتاريخكم يالحارثي ما يبي تبرير
شهوده فعوله واعتبر صيتكم برهان
ومن بعد هذا يا سعيد القصيد أشكال
وكل قصيده يثبت اسمه في الميدان
وأنا شفت من ينظم كلام فقد معناه
ختل قافياته وانثنى تايه حيران
وحاول يضاهي كل شاعر لكسب الصوت
وبالعكس عوّد نادم فاشل خسران
وكم واحد يظهر على كيس بعض الناس
وحصل لقب شاعر مخضرم وله ديوان
حصل له مراده وانثنى شاعر مشهور
يهمه يقال افلان ويقال ابوه افلان
ويا بو زميع الوضع يحتاج له تشخيص
ونبغاك تعطينا علاج لهذا الشأن
ومثلك لهذا الجرح يا عزوتي دكتور
يعالج قضية شرها شيّب الورعان
وبه شاعر يحبك قصيده بشكل غير
تعامل مع نظم القوافي بكل اتقان
تباعد عن الشهر ولا لحقه التشهير
سبك مفردات الشعر بالقاف والميزان
فهو شاعر جزل المعاني عداه اللوم
تطيعه حروف القاف يا شيخ مهما كان
وهذا حسب ما شفت في ساحة الشعار
ثلاثة نبي تشخيصهم منك يا شيهان
وذا موجز المكتوب والشرح والتفصيل
وعذرا إذا في قافنا يا فتى نقصان
وصلوا عدد من طاف بالبيت واللي زار
على الهادي المبعوث سيد ولد عدنان
|