يا للي تبي راحة البال
نصيحتي يا للي تبي راحة البال
اجعل كتاب الله لك أجمل سياحة
واعلم ترى وقتك ولو زان لك مال
لو يستوي ليله تكدر صباحه
واقبل نصيحة شاعر بالمثل قال
وأعطاك نصه بالنبط والفصاحة
أقول لا تلهث ورى جمع لموال
ولا تخلي للمطامع مساحة
هوّن على نفسك ولا تتعب الحال
واطلب من الله الرضاء والسماحة
ولا تهاون في حسينات لعمال
واحذر تفرط في عموم المباحة
ترى حياتك بين حل وتر حال
والعمرترمي بك هبائب رياحه
العمر مهما طال لابد رحال
فلا يغرك لو بسط لك جناحه
فلا تقلب في محيطات لشغال
ويموت قلبك قبل يدرك نجاحه
كافح وعش دنياك من دون تحتال
واجعل لروحك من عناك استراحة
واحذر تطاوع من سلك درب لضلال
اللي خسر جهده وضيّع كفاحه
طاوع شفوف النفس في كل لهوال
حتى رما نفسه بسطوة رماحه
وأصبح مصفد بالسلاسل ولغلال
في عالم يفقد وجود الصراحة
رماه غيّه في مشابيك لنذال
وأغراه من لا يستطيع السباحة
في وقت تاهوا في مراميه لبطال
وأصبح عدو الله يشهر سلاحه
غرر وراه أجيال يا شيخ وأجيال
واللي عصى قوله حصل له فلاحه
واليوم تسمع شي ما كان ينقال
عجل لعين ا لمستحي بالنياحة
الناس ضاعت بين نت وجوال
وبلاك بيري فيه نشر الوقاحة
نرجيك يا عالم مواعيد لاجال
تفزع لقلب يسألك بانشراحه
وفالختام أقول ما مشغل البال
في غير دين الله ما فيه راحة
|