حلفت أنا منساه . منساه . منساه = لو طالت الايام ماني بناسيه
اللي ذبحني في صدوده وجفواه = مكانته فوق الزعل والمشاريه
الغالي اللي شد قلبي من أقصاه = يفز قلبي كل ماحل طاريه
كل مابغيت أنسى غرامه وطرياه = يفوح ريح المسك بكفوف غاليه
خلن ملك قلبي بضحكة محياه = هو الوحيد اللي عيوني تراعيه
أعزف له أحساس الغلا والمعاناه = وأسمع صداها بين الاضلاع يبكيه
لو كان بالدنيا .. مثيله وشرواه = ماضاق كل الكون بعيون مغليه
عزآه ياقلبٍ من الحب عزاه = عزاه ياقلبٍ من الشوق يدعيه
يفداه جرحٍ يحتظر يوم فرقاه = ويفداه مضمون القصيد وقوافيه
كن الحنين اللي تغطرّس بمعناه = يستوطن حروف الوفا في معانيه
أحلى الليالي ذقتها يوم لقياه = وأقسى الليالي لا تذكرّت ماضيه
كل ماذكرت سنين عمري بلياه = يضيق بالي وأزرق الدمع يرثيه
على دروب الحب هاذي بقاياه = صرح المحبه ماتحطّم مبانيه
ماله شبيهٍ في عيوني ويشداه = ماله مثيلٍ بالحبايب يشاديه
أعيش مع حبه وطيفه وذكراه = لامر زوله قمت بالصوت أناديه
غاب وتركني للسهر والمناجاه = مع ذكريات الامس دمعي يحاكيه
سهم المحبه وسط الاعماق مرماه = ونيشان حبه بالموادع يباريه
يأخذني الهوجاس وأذكر مزاياه = كل مانزف جرحه بقلبي أخفيّه
وحلفت أنا بالله لا يمكن أنساه = ولو مرت الايام ماني بناسيه