السؤال اللي يدور للأجابة
قبل تصفيق المعاني للمعاني

هل بقى للحب ياحرفي كتابة
او رحل بين التمنّي والأماني

كم قريت الخبث بعيون الذيابة
وكم بكيت الصدق بعيون الغواني

وكم فقدت النوم والصاحي زهابه
فكرةٍ عنوانها صدق البياني

في مثانيها مواعيدٍ تشابه
وفي نهايتها مكاني يامكاني

حرف شعري يحتميني وانتسابه
يهتويني ويخلقني عمر ثاني

والزمان اللي بكاني لاغرابة
أبتسم له وأدري ان العمر فاني

وإن هشم صبري تحت ضرسه ونابه
قلت ياراسي لاترضى بالهواني

أحتزم بالراي والراي المجابه
والتزم بالحق عن قاصي وداني

والوجيه اللي لها قدر ومهابة
اعتبرها من مواريد الضماني

في حديث الشعر وفنون الخطابة
يبتكر فكري ويظهرها لساني

وإن طلبت العقل لايفقد صوابه
تاه في ثورة براكين الزماني

يمتطي صهوة الأمل ويصك بابه
ويهتوي صوت الفقير اللي يعاني

ويرتمي عند الأمير اللي شرابه
من دمي ويعد روحي بالثواني

ويهدم قصر العفاف اللي ثيابه
تكتسي لون البياض من التفاني

وان طلبت الصبر ياقوس الربابة
غنّت أحزاني على ساحل عماني

أنتهى حرفي وضيعت الأجابة
وأبتديت اعيد تفضيل المعاني