يا لابس البشت خل البشت لأصحابه = ماهو بلايق عليك ولا أنت لايـــــــق له
البشت له ناس تعرف له وتعنـــى به = أرث لها من زمان وسبلها سبــــــــــــله
والعرف والصدق ما كل طرق بــابه = يا كم غشيمٍ يحاول به وهو هتــــــــــــله
والعاقل الله عطاه العقل يــــزهى به = دائم يقديه فيما ينبغي عقــــــــــــــــــــله
ومحبة الناس والفزعات جــــــــلابه = للكفؤ وأعماله الجزلات تشـــهــــــد له
والشعر لو جاء به الملسون بخطـابه = ماهو بحقٍ على ما قيل ينســـــــــــب له
وأهل المثل قالوا إن العنز حـــــلاّبه = لكن حلاّبها جاها الخبل قبـــــــــــــــــله
وهذي ظروف الزمان وهذي أسبـابه = تخدم رويبض وراعي الطيب توقف له
وأنا من الله بخير ولابتــــــــــي لابه = أهل البلاجيك والوقفات والصمــــــــله
في السلم تسلم ووقت الحرب حـرابه = خصّامهم في دبور وينقطع نســـــــــله
واللي زبنهم زبن وينوخ ركـــــــــابه = ويلقى الكرامه ومطلوبه حصل لأجــــله
لنا تواريخ فعل ماهي كـتـــــــــــــابه = في كل موقع لنا فعل ثبت أصــــــــــــله
فعل يشرف ماهو ختلات ونهـــــــابه = ولا هو على شأن برج ما وجب حِـــــله
والمعذره لو قصر شعري وما جاء به = في مدح ربعي ولا خاوتني الجــــــزله
فاللأبه أكبر من الشعر وتحكــــــى به = وأنا أعتبر خادم لربعي على المِـــــــله