الفهد رحّب وهلاّ = بالكرام اللي لفوا
القمر نورهُ تجلى = يوم عزوتنا وفوا
ألفوا بين القلوب = وحدوا كل الدروب
وحدةٍ والرب شاهد = من شماله للجنوب
كونوا درع الجزيرة= قوة تحمي المسيرة
كلهم عند الشهادة = الوليد وبن المغيرة
نفتخر بك يا خليج= نبني عزك يا خليج

بحاره في وقت السحر= تجمعوا كل حضر
وجهة سفرهم للبحر= في رحلة الغوص الغزير
في بحرهم در ثمين = أمالهم طول السنين
ينظم العقد المتين = يجنوا بها الخير الكثير
وصلوا للغبة العميقة = والأمل بيّن طريقه
تكاتفوا كل وقف= توجهوا نحو الهدف
وبعد ساعة من النهار= طلعوا وفي يدهم محار
بكلهم وكد وعمل= من أجل تحقيق الأمل
اللي على خيره نسير= ونحقق الحلم الكبير

هبت عليهم من شمال = ريحٍ مثل سود الليال
عكرت صفو الخليج = وقامت أمواجه تهيج
تشاورا وتكاتفوا= وفكروا وتحالفوا
توحدوا في صفهم= وربي يسر أمرهم
أثبتوا بالعهد قوة = جسدوا معنى الأخوة
وعقد المحبة أنتظم = وباركت كل الأمم
جمعت فيها الحبايب= بكلمةٍ والرأي صايب
ننظم اللؤلؤ بذهب= ونحقق أمال الشعب
ونحمد اللي قد وهب= هذي عطايا ربنا

لؤلؤة فيها الكويت =شعبها الطيب هويت
ساكنة وسط القلوب= خيرها في كل الدروب
زاهية وأحلى بلد = ابتسم فيها السعد
تعتلي درب الفاخر =عزها دايم بجابر
قال ووفي في كلامه= بعد ما ثنى سلامه

ولؤلؤة في ها البحرين بسحرها= يجذب الزاير نسايم عطرها
عالية وتاج الفخر من شأنها =. في دروب العز علت شأنها
نجمة في حضن البحر= عشب وأمواج وقمر
حسن لا يمكن نقيسه = قادها في الحب عيسى
قال ووفى في كلامه = بعد ما ثنى سلامه

ولؤلؤة فيها قطر= بالحب تفتح بابها
ديرة العز والفخر= وشعبها يهنى بها
أهلها طيب وكرم = فعاداته كله شيم
هانيه حلوه وليفه= صوتها ردت خليفة
قال ووفى في كلامه= بعد ما ثنى سلامه

ولؤلؤه فيها الإمارات= من نصاها تسعده
كلهم أخوه وجارات= والقلوب موحده
رأيهم دايم سليم= قولهم وافي حكيم
أخوة والراي واحد= قادها بالخير زايد
قال ووفى في كلامه= بعد ما ثنى سلامه

ولؤلؤة فيها عمان= عطرها طيب وجود
في روابيها الأمان= وفي نسايمها ورود
شامخة في كل المحافل= تسعف الخير وتواصل
تزخر بطيب النفوس= وعالي القدر قابوس
قال ووفى في كلامه= بعد ما ثنى سلامه

ولؤلؤة فيها السعودية= راية التوحيد تنور دربـــها
وافيه بالقول والنية= عينها طـــيــبه ومكة قلبها
عصرها باهي وزاهر= خيرها شامل وظاهر
رمزها مجد وبطولة = ودارها بالجود عامر
والسفينة اللي جرت= في شواطيها رست
والفيافي تعطرت= يا هلا بأغلى الضيوف
وصلوا الدرة الكبيرة = الغالية أم الجزيرة
وفهد قاد المسيرة =وابتدآ بصدق الحروف
قالوا وفى في كلامه= بعد ما ثنى سلامه