ياقلب لا تندم على ما فات واللى صـار صـار=وشفيك لك يومين في صدري مسـوي شوشـره
أدري ان ما يدفع ثمن طيش الصغار إلا الكبـار=وادري إن ما يطفي جحيم غيابهـا إلا المقبـره
وادري انها تملا عيون الكون دهشـه وانبهـار=والكون مايرضي غـرور اعيونهـا المستهتـره
شموخها اقسى من مقولة ( دق راسك في الجدار)=وضعفها ابلغ من كـلام العفـو عنـد المقـدره
اجـي لهـا وانـا بنيـة فـارسٍ طـلاب ثـار=وارجع بنية شيخ جـا ينخـاه مقطـوع اشجـره
من فرط انوثتها يصيب الحزم حـالات انهيـار=واذا اشتكت من ظلم جاها العدل يطلـب مغفـره
اذا ازعلت ترمي سواد الليل في وجـه النهـار=واذا رضت تقلب عزا السلطان ضحك وغشمره
تسكت ويبقى المستمع مخنـوق يتنفـس غبـار=واذا حكت كـن الشفايـف جمرتيـن ومبخـره
ما ارضى انها تزعل ولكن مشكلتها باختصـار=تحـب تدلـل كثيـر وهستـرت بـي هستـره
ترفه ودلوعه كـذا بطـره بـدون اي اعتبـار=تجمع هناهـا بيـن اصابعهـا وترجـع تنثـره
تجي تحدانـي ونلعـب فـي مشاعرنـا قمـار=احياناً اكسب ودهـا واحيـان بالعنـد اخسـره
تزعل وتجفاني وانا تارك لها اكثر مـن خيـار=إن جت تجي وإن فضلت ترحل فلا هي مجبـره
وإن راسها يابس فانا لاخذت في نفسـي قـرار=أدعس على قلبي ولا اتنازل وتلعب بـي مـره