إضحك وفل حجاجك إشفيك محزون ** دنياك ما تسوى وخذها نصيحة
ما دام مالك ميت ولا انت مديون ** إرم الهموم وخل نفسك مريحة
لو كانوا أصحابك يضاهون مليون ** نـق الكفو منـهــم وخل السطيحة
ولا تشتكي للناس لو كنت مطعون ** والذم من بعض الخلايق مديحة
ولا تـنـحني للهم وتعيش مغبون ** ترى المريــح أهل العقول الصحيحة
لا صرت صادق قالوا الناس مجنون ** ما يـمدحون إلا النفوس القبيحة
وخلك صمود بوجه الأيام دندون ** وما حرّم الله إثم لا تستبيحه
والكبر لو به فائدة فاد فرعون ** ومن ذاع سرّه بشــّره بالفضيحة
والله لو يعطون لك مال قارون ** ما شفت نفسك بالغنى مستريحة
إنـفض هموم القلب وإبليس ملعون ** وإن ضاق صدرك أرض ربي فسيحة