ما أملك إلا أقول السمع والطاعة
معك أنت حتى العطايا تبسط إيدها

لو تجرح القلب وإلا تقلب أوضاعة
الراحه اللي بعد فرقاك... مابيها

حبيتك الوقت كله ... مابقت ساعة
وتركت لك هالدقيقة . . . حبني فيها

ماقلت لك عن عذاب القلب وأوجاعة
بعض القصايد . . تموت بقلب راعيها

العين ديرة نظر . . . والنفس طماعة
مافيه أحد يملك الدنيا ويعطيها

لو نفترض كل شخص يغير أطباعة
الناس ماتقتنع باللي حواليها

ماخانك المركب . . اللي خانك شراعة
وما يعجبك بالسوالف غير تاليها

واللي وقف بين صفاعة . . ونفاعة
هذاك أنا يوم أطوفها . . وأعديها

الحب من يوم شفتك تلوي ذراعة
عرفت ليه البشر تكثر بلاويها