لحظة حيـــــــاتي الاخيرة

العين فاضت بالدموع الغزيرة ==== والقلب يشكي من حالة الحرمان

والحب ضايع والقلب في حيرة ==== والعمر يمضي ولا يعود ماكان

حبيتها ..كانت هي طفلة صغيرة ==== وانا الصغير اللي عاشق وشفقان

تلعب تمثل لي دور الاميرة ==== وانا البطل الي يحاكي سوبرمان

كانت مشاعرنا مثلنا صغيرة ==== واسمها ياكم خطيت به جدران

اشوفها احلى غزال بالديرة ==== حورية الجنة في صورة انسان

نكبر وتكبر معانا المسيرة ==== وصار في قلبي بدايات بركان

امها قالت هم صرتي كبيرة ==== لاتكشفين اليوم ياعود رمان

شفتها صدفة هب لحظة قصيرة ==== والخجل جاها واحمرّت الأوجان

تغطّت واشهقت شهقة مثيرة ==== وانا وقفت شوي تايه وحيران

سميتها لحظة حياتي الاخيرة ==== والفرح صار من بعدها احزان

والعين فاضت بالدموع الغزيرة ==== والقلب يشكي من حالة الحرمان

جبل حرفه