ياناعس العينين بالهون بالهون
................. دخيلك ارفق بي تراني رهينك

انا من عيونك مكبّل ومسجون
.............. تكفى ترى بالّلطف ترحم سجينك

ياملْهمي عذبات الابيات بشجون
................ وملبّسٍ شعري تواصيف زِيِنك

تبغى الصراحه مثل ماهم يقولون
................ نور الدجى بدره يشابه جبينك

ليت الليالي وصلها فيك مضمون
.................. حتى تجلّى لي واناظر بعينك

يانادرٍ في الطبع والشكل واللون
............. تعرف غلاتك واعرف اللي بكنينك

ياعلّ يومي قبل يومك ولا تهون
.............. وياجعلها تبطي سنيني وسنينك

مزبون ياخلّي من الجور مزبون
........... وانا على اصروف الدهر لك زبينك

ماتدري انّك تآمر الامر وتمون
............. وانا على الطاعه مدامي ضنينك