الجزء السادس



الجزء السادس
في بيت بو مازن

مازن : رجعت البيت وحصلت اخواني وامي وابوي كلهم يالسين في الصالة هاي عادتهم بعد العشى وطبعا انا اليوم انحرمت من العشى معاهم بس احس تغير ههههه قربت وانا اشيل في ايدي الكيسه اللي فيها الهدية وحبيت اماية على راسها وابوي بعد وطالعت على الكل وسلمت عليهم وحاولت ابعثر نظري لا يوصل لذك الجسم اللي يالس على كرسي منفرد وشكله ولا هو معاهم ههههه غصبا عني ما قدرت ما اطالع عليها

مزنه : وينك فديتك بصراحة العشى بلاك ولا شئ

قيس : يا اللواته ما كأنها كلت صحني وصحنها وكانت بعد بتاكل صحن خطيبتي بس عاد انا زوروا ما سمحت لها وقلت لها حدج هههههههه

ام مازن وبو مازن وفيصل ومزنه ضحكوا ما عاد الغلسة اللي دوم تغلس ما ضحكت وبعد تجاهلت ها الموقف لاني بصراحة خلاص ما ابي افكر في شئ

مازن : اول مره فضولكم ما يقتلكم وتشوفوني داخل وشايل كيسة وشكلها حلو يعني هدية ولا تسألون حج منو؟؟

قيس : اكيد حجي انا لانه بعد كم شهر عيد ميلادي

فيصل : استغفر الله شو عيد ميلادك بعد احنا مسلمين ما عندنا غير عيدين

مزنه : بعد هي قالت تستاهل فشلوك ههههههه اكيد الهدية لي انا

الريم : للحظة حسيت ان الهدية هاي لي انا وعشان جي خفت ان ها الاحساس يظهر قدام الكل وحاولت اني انش لاني مب حمل اني اتفشل قدامهم وصعقني صوت مازن اللي وصل لي وقال اكيد لج يا مزنه ..

مزنه : صار ويها احمر معقوله مازن يايب لي هدية نزين شو المناسبة؟

ام مازن وبو مازن وقيس وفيصل كلهم بعد رددوا نفس الكلمة شو المناسبة؟؟

مازن : بدون مناسبة بس اختي حبيبتي ما لي غيرها شفت ها الهدية وعيبتني بصراحة وتمنيتها لاختي عندكم مانع ؟؟

قيس : لا يا بوك لا مانع ولا دواس ولا خطر ولا امها حكيمة بعد

ام مازن : وانت ما بيذبحك شئ غير ها المسلسلات اللي تطالعها

قيس : واي انتي حرام عليج اشفيج علي يعني اللي يسمعج يقول انها هي ما تطالع معاي ههههه

مزنه : هيه تراه مطالعة التلفزيون وراثة اتذكر يدي الله يرحمة

كلهم قالوا الله يرحمة ويرحم موتانا وموتا المومنين

الريم : لا خلاص اعصابي انهارت وعشان جي نشيت وطلعت غرفتي بصراحة اسلوب مازن معاي في الفترة الاخيرة قاهرني وخاطري افهم ليش تغير علي كل ها التغير انا شو سويت؟

في حجرة مازن

بعد يومين من ها الاحداث وبالتحديد كان اليوم الاربعاء كنت يالس في حجرتي وبعد ما عجبتني الفكره اللي خطرت في بالي طلعت من حجرتي وسرت غرفة اختي مزنه دقيت الباب بس ما حد فتح لي وعشان جي دخلت ما حصلتها في الحجرة عرفت انها يمكن تكون تحت عند اماية نزلت ولكني ما حصلتها لا هي ولا اماية استغربت وسألت الخدامة عنهم قالت لي انهم طالعين من البيت ما فيه حد غير مدام ريم وهي في حجرتها ..

مازن : شكرت الخدامة ورديت اطلع حجرتي وياتني فكره اني ادق باب الريم لكن شو اقول لها ؟ لا لا وعشان جي سرت حجرتي ولبست كندورتي واتصلت بسعيد ربيعي اللي عرفت انه ياي العين اليوم وتواعدت وياه ما ابي ايلس في البيت ما ابي اضعف قدامج يا ريم مره ثانية خلاص اللي وصلني منج كفاية وطول الطريق وانا ساير اشوف سعيد افكر فيها ما قدرت ما افكر فيها هاي ساكنه قلبي وعقلي يا ربي خلصني من ها الحب ..
في بيت بو حسين

حسين كنت يالس في السيارة بصراحة مالي خلق انزل البيت لاني من ادخل البيت واشوف اماية اتذكر انها السبب اللي حرمتني من الانسانه اللي حبيتها طول عمري مزنه بس بعد قراري الاخير لازم اتحرك عشان جي اتصلت باختي خلود على مبايلها وقلت لها انزلي انا في السيارة ونزلت حليلها بسرعة وطلبت منها تركب السيارة (ما طلعنا مكان تمينا في السيارة بس لانه المكان الامن اللي ممكن ارمس فيه معاها وما حد يسمعنا)

خلود : شو عندك حسون؟

حسين : مزنه

خلود : مزنه بنت خالي

حسين : هيه انا من يوم حكمت علي اماية اني افسخ خطبتي منها وانا يالس احاول اني انساها لكن بعد عزاء هاني ومن شفتها حسيت اني ولا يوم قدرت انساها هاي مزنه حب طفولتي هاي مزنه اللي حلمت انها تكون زوجتي وام اولادي هاي الغالية

خلود : حال اخوي ضايقني فديتك يا خوي لها الدرجة تحب مزنه

حسين : واكثر عشان جي انا ابيج تساعديني انا ابي ارجع لمزنه وابيج تقولين لها ها الرمسة ولو وافقت انا بتحدي الكون عشان نكون لبعض

خلود : ما طلبت يا خوي افا عليك باجر بزورها وبقول لها كل شئ

حسين : سلمتي غناتي والله بلاج ما بعرف كيف اتصرف

في بيت بوطارق

ثريا : بصراحة حسيت براحة كبيرة بعد ما ردت اماية على خالتي ام خالد باني مب موافقة على الزواج .. بس اماية كانت معصبة علي وعشان جي تحاشيت الرمسة وياها وقررت اني اطلع حجرتي بس يات الخدامة وقالت ان خالتي ام مازن برع طلعت انا وماية وستقبلناها ودخلنا ميلس الحريم وعقب شفت ان اماية مب طايقة لي رمسة عشان جي نشيت وترخصت من خالتي ام مازن وسرت حجرتي .

ام مازن : بلاج ام طارق شو فيج على البنية؟

ام طارق : ما ادري ياختي شو اقولج يعني متقدم لها ريال والنعم فيه ما ينقصة شئ وهي تقولي ما تباه وبصراحة فيني ضيق يوم رديت على ام خالد ان مب موافقين تلومت فيها

ام مازن : يا ختي الزواج قسمة ونصيب ويمكن ربج ما كاتب لها معاه لكن كاتب لها مع غيره وكلي ربج ياختي ولا تضايقي بعمرج بعدين ثريا فديتها ما من كبرها يعني فرصة الزواج قدامها يسد انها بنت راشد ويسد جمالها واخلاقها وسنعها (ما انكر اني استانست يعني الحين ممكن اخطبها لمازن لكن بعد اخاف انها ترفضة)

ام طارق : حسيت اني مكبرة الموضوع عشان جي طلبت من الخدامة تيب الفوالة وحاولت اغير الموضوع وارمس عن طارق ولدي اللي ما باقي شئ على رجعته فديته واني ها الايام منشغلة ارتب له قسم كامل في البيت

ام مازن : يلست مع ام طارق ساعة وعقب ترخصت عنها وسرت البيت بعد ما تصل فيني بومازن وقال انه في البيت .

في بيت بومازن

في الحجرة كان بومازن راقد على الشبرية وحتى ما مبدل ملابسة قلت لها بلاك فديتك قالي احس بردان وحمى في جسمي عشان جي قربت صوبه وهيسته فديته حرارته كانت مرتفعة وغطيته واتصلت بمازن ما رد علي واتصلت بفيصل وقالي انا قرب البيت عشان جي قلت لابو مازن ينش عشان فيصل يوصلة المستشفي وطبعا انا سرت وياه ما اقدر اخلى بوعيالي يسير بروحة

مازن : كنت مشغول وايد اليوم في الشغل عشان جي مبايلى ما قربت صوبه وما رديت على أي مكالمة لكن من فضيت طالعت منو متصل فيني وشفت رقم اماية رديت اتصل عليها بس ما ردت قلت يمكن تبي توصيني على شئ انا وراجع وقلت بتصل قبل لا اظهر بنص ساعة

مزنة : بعد انتهاء الدوام تميت اتريا مازن اللي متعود يمر علي وركبت السيارة معاه وقصر مازن على صوت المسجل وعرفت انه يبي يقول لي شئ

مازن : مزنه ابيج في موضوع ما ادري ان كان الحين وقته وله لكن ما عندي وقت غير الحين افاتحج فيه بصراحة يا مزنه فيه شخص فاتحني انه يباج تكوني زوجه له هو عميل عندكم في البنك وقالي انه في خاطره انه يرتبط فيج وما يبي يلف ويدور معاج عشان جي هو حاب انه يدخل البيوت من الابواب

مزنه : استغربت رمسة مازن وما انكر دار في نفسي سؤال منو هذا العميل اللي طلبني من مازن وبصراحة اكثر انصدمت لطرح الموضوع خاصة ان خلود بنت عمتي فاتحتني في نفس الموضوع بس طبعا العريس ولد عمتي حسين ..

وصلنا البيت وبصراحة عقلى رغم اني اتضاهر بعدم المبالاة إلا ان الموضوع فعلا محير لكني حاولت اني اتغلب عليه بس ما قدرت اتغلب على الصداع اللي ما رضى يخليني وبصراحة ما ادري شو سببه الرئيسي (استغبي اكيد ههههه)

في بيت بو طارق

ام طارق ها المره فرحانه بالقو وطلعت لبنتها ثريا وهي الارض مب شايلتها وابتسمت لثريا وقربت صوبها ولوت عليها وطبعا ثريا مستغربة شو اللي يصير بلاها امها جي فرحانه وقالت لها اكيد طارق كلمج وراجع لاني اعرف انه ما يفرحج كل ها الفرحة غير رجعة طروق دلوعج

ام طارق : ما انكر رجعة طارق تفرحني لكن اللى مفرحني اليوم شئ ثاني وفجئة تغيرت ملامح الفرح اللي في وجه ام طارق وقالت بصوت حزين بس خايفة انتي تخربي علي ها الفرحة

ثريا : انا!!! كيف ؟؟

ام طارق : فيه شخص تقدم لج وها المره ما اعتقد فيه أي عيب ممكن يخليج ترفضية

ثريا : قلت في خاطري يا ربي انا ما راح اخلص من العرسان هذولا يا ربي ما ابي اعرس وكنت بقول ها الكلام لامي بس اللي قالته صدمني

ام مازن : خالتج ام مازن اليوم طلبتج لولدها مازن

ثريا : حسيت ان الدنيا مب شايلتني يا ربي اللي اسمعة صج وله حلم (كان خاطري في ها الحزه اماية تضربني عشان اتأكد انا في حلم وله في علم) بس ايه اماية قدامي وطالعت على الشباك اشوف الجو عصر صح يعني انا ما احلم وكنت بفضح نفسي وبصرخ لو اني احس ان عيوني فضحتني (ما ادري صح وله بس انا احس جي)

ام طارق : بلاج تطالعي يمين وشمال شو عندج لا تقولي بعد انج بترفضين مازن ولد خالتج ام مازن يا فضيحتي قدامها

ثريا : في خاطري اقول شو ارفضة إلا انا خاطري اكون زوجة لمازن اليوم قبل باجر فديتك يا مازن فديتك

ام طارق : ردي علي شو ؟؟

ثريا : هاه شو تقولي اماية

ام طارق :بلاج شو فيج

ثريا : ما شئ بس بصراحة ما توقعت

ام طارق : هذا اللي صار وانا بصراحة ما بقول لابوج لحد ما اعرف رايج انتي لاني اعرف في النهاية رايج هو اللي بيمشى

ثريا : اللي تشوفونه يا يمه

ام طارق : شو اللي اسمعة شو يعني اللي نشوفة لا طبعا ابي رايج انتي موافقة على الموضوع بشكل مبدائي ؟؟

ثريا : ما اعرف شو اقولج يا يمه

ام طارق : لا تقولي أي شئ انا بعطيج فرصة تفكرين ما راح اغلط الغلطة الماضية وصلى استخارة وعقب ردي علي

ثريا : بعد ما طلعت اماية من الغرفة قلت انا ليش ما قلت لها اني موافقة ليش كل ها التعقيد (شو بلاني شكل الحب اثر فيني لا لازم ما نحسسهم انا ميتين فيهم ههههه ويلى على يكابر)

في بيت بو حسين

حسين : بصراحة انتظار رد مزنه بنت خالي وايد مخوفني مب عارف شو ردها بعد ما فاتحتها خلود اني احبها واني مستعد ها المره اسوي كل شئ واوقف في وجه العالم كله عشان نكون لبعض يا تري بتوافق وله ؟؟ مجرد احساس ان مزنه ترفضني يصيبني بذعر وخوف معقوله بتم جي بعيد عن الانسانة اللي حبيتها؟؟ ما اعرف ما اعرف ونشيت وخذت سويج سيارتي وظهرت من البيت (ادري انه هروب ونفس الوقت يلسة البيت تخليني افكر وايد)

في بيت بو مازن

الريم : مليت كل شئ وبصراحة صرت افكر وايد في وضعي وابوي وامي افكر في حياتي معقوله راح تظل جي احس اني عايشة بدون هدف وما ادري ليش لمه سمعت عمتي اليوم تبشر مازن ان ثريا وافقت على خطبته لها اللي كلنا ما يعرف عنها (صحيح اني كنت اعرف بشو تخطط له عمتي وانا كنت اخطط له لكن ما دريت ان عمتي فعلا كلمت قوم ثريا عن الخطبة)
ما ادري ليش حاسة متضايقة ومب عارفة شو فيني معقوله اني مريضة ؟
حتى اني مب طايقة حد يرمسني ولا حد يقولي أي كلمة حتى قيس اللي ارتاح له ومزنه اللي صارت ها الفترة قريبة مني .

مزنه : بعدني حايرة ومب عارفة وما انكر اني صليت استخارة بس احس اني بعدني مب عارفة شو اسوي يا رب ساعدني هذا هو دعائي اللي ادعية كل يوم وما انكر اني متضايقة من اتصال خلود المتكرر لي ادري انها تبي تعرف ردي صحيح هي ما تسألني مباشرة ويمكن بعد ما انكر اني يالسة اعاند (يمكن حانت الفرصة اني انتقم من حسين ولد عمتي علي سواه فيني ) بس بعد ما انكر ان حسين بالنسبة لي حب الطفوله وحب الطفوله صعب انه يتنسى وخليل شاب محترم بصراحة ما فيه شئ ينعاب .

فيصل : بصراحة حاولت اني اقترب من اختي مزنه خاصة اني لاحظت تغيرها الكبير بعد وفاه هاني واللي خلاني شوي اقرب منها اكثر وحتى هي احس انها صارت ترتاح لليلسة معاي والسوالف معاي (صحيح رب ضارة نافعة)

قيس : انا بعدني مب قادر انسى اخوي هاني واحيانا كثيره وانا راقد افكر فيه واتم ابجي مب قادر اقتنع ان هاني خلاص مب في الدنيا مب موجود ها الشئ مأثر فيني وخلاني انتبه لشئ ان الموت ما يعرف الصغير والكبير ولا يفرق بينهم وانه ممكن يكون يجي بدون سابق انذار (ها الاحساس خلاني اخاف من الموت وصرت افكر في القبر وعذابة ) وخلاني ادعي وايد لهاني في قبرة حتى اني احاول اختم المصحف كم مره لروح اخوي هاني عشان تونسة في قبرة انا سألت مدرس التربية الاسلامية شو هي الاشياء اللى ممكن اسويها للميت وقالي كثر من الدعاء له وقراءه القرآن على روحة .

ام مازن : ما انكر ان خبر موافقة ثريا على مازن اسعدني ونفس الوقت ضايقني لاني كنت اتمني ان هاني يفرح معانا في عرس اخوه بس لمه شفت بو مازن مستانس حاولت اني اغير تفكيري وادعي لولدي بالرحمة وادعي لمازن بالتوفيق في حياته الياية .

في بيت بو طارق

ام طارق : بصراحة حاسة بالفرح الكبير بعد موافقة ثريا على مازن ورتحت اكثر لمه رديت على ام مازن اللي حسيتها هي الثانية ارتاحت وستانست وايد

ابو طارق : من قالت لي ام طارق خبر موافقة ثريا عرفت شو كان يشغل تفكير بنتي يعني مازن هو اللي كان في بالها وفرحت لها وايد .

ثريا : مب عارفة اللي يصير حلم وله حقيقة بعدني مب مصدقة لحد ما اكون زوجة مازن على سنه الله ورسوله يا ربي احمدك واشكرك على فضلك .

في قمة يبل حفيت

مازن : من قالت لي امي خبر موافقة اهل ثريا حسيت بقبضة في القلب وحسيت ان اكتئاب الكون كله اجتمع فيني الحين بس عرفت اني اللي سويته غلط واني حطيت نفسي في موقف ما ادري كيف بظهر منه معقوله الحين اقول لامي لا ؟؟
في ها اللحظة مب محتاج اسمع احد حتى اتصال سعيد ربيعي لي تجاهلته حاس اني بحاجة لدموعي وفعلا كاهي تسيل على خدي ومع كل دمعة اقول الله يسامحج يا الريم علي سويته فيني والله يسعدج في حياتج ومع كل دمعة اعتذر لقلبي لاني ما قدرت احقق له امله وحلمة ان تكون الريم هي الوحيده فيه لاني مب معقوله اتزوج ثريا واظل افكر في الريم ..

يعني من اليوم لازم اشيلج يا الريم من بالي حتى تفكيري لازم اشيلج منه خلاص قلبي لازم اسلمه غيرج عشان ما اظلم ثريا معاي اللي ما ذنبها أي شئ .

اه يا الريم كيف بقدر انساج وانتي سكنتي قلبي من اول ما عرفت معني الحب من اول دقة من دقات قلبي بمشاعر غريبة كانت كلها تنادي اسمج اه يا ريم على كل حلم حلمته اني اكون زوج لج وتكوني زوجه لي .. اه يا ريم لكل حلم حلمت فيه اني اسعدج واهنيج واعوضك قسوة الايام عليج ..

شئ غريب خطر في بالي الحين ومسكت مبايلى واتصلت على مزنه بعد ما مسحت دموعي وقلت لها ابي اكلم الريم بدون ما اقول أي شئ غيره وشكلها استغربت لكنها نفذت وكاهي في غرفة الريم تقول لها تلفون لج عقب ما سمعت صوت مزنه ما ادري ظهرت وله تمت ما يهمني

الريم : تفاجأت منو متصل علي على تلفون مزنه وقلت لها منو؟؟ بس ما ردت علي بس عطتني المبايل وظهرت.

مازن : هاي اللحظة حسيت ان الدموع نزلت مره ثانية بس سمعت منها كلمة الو منو ؟؟

الريم : ما فيه حد يرمس بس اسمع انفاس تتصاعد وفضولي بيقتلني ابي اعرف منو وابدا ما توقعت المتصل مازن وبصراحة خطر في بالي ان ثريا داقة

مازن : بعد ما مسحت دموعي وحاولت اتماسك قلت بصوت متقطع الــــــريـــــم

الريم : انصدمت المتصل ريال والصوت مب غريب علي صوت مازن اللي اقدر اميزه وسط مليون صوت وقلت انا بعد بصوت متقطع ومتفاجئ مااااااازن؟؟؟

مازن : كنت اسمع انفاسها هي الثانية سمعت صوتها وهي تنادي اسمي يا حلاة اسمي وهو طالع من بين شفايفها وتميت اتخيلها بصراحة مشتاق لها موت رغم انا في بيت واحد إلا اني حاس اني متوله عليها

بس للاسف مره ثانية خانتني شجاعتي وبدل ما اقول اللي في قلبي اطريت اني اقفل المبايل للمرة الثانية اكيد اني خليت الريم في حيرة اكبر من المره الاولي .

الريم : لا تستغربون لاني فعلا ها المره ما استغربت تصرف مازن لاني صرت متعودة على تصرفاته الغريبة معاي بس ما انكر ان فضولي بيقتلني اني اعرف شو هو الشئ اللي يبى يقوله لاني حاسة ان فيه شئ يبي يقوله .

مزنه : بعد نص ساعة من ما عطيت الريم مبايلى طلعت اشوفها خلصت وله وحصلتها تصلى ومبايلى على الشبرية خذته ويلست انتظرها لحد ما تخلص مصليه لاني كنت بسألها شو يبي فيها مازن وفعلا بعد ما خلصت سألتها هاه شو عنده مازن؟

الريم : كنت طالبة منه يب لي مرجع من المكتبة عشان اسوي بحث بس يقولي انه ما حصله ويسألني اذا يجيب لي شئ ثاني وله (كيف جذبت ها الجذبة ما ادري حسيت هي اللي طلعت معاي)

مزنه : بكل سهوله صدقت الريم وخذت مبايلى وطلعت وسرت الصالة ايلس مع قيس اللي صارلي فتره احس اني ابتعدت عنه وتميت اشرح له بعض مسائل الرياضيات لاني شاطرة في الرياضيات .

بعد اسبوع من كل ها الاحداث وبالتحديد الساعة 8 بالليل في بيت بو مازن كانت عمتي ام مازن تدخن عمي ومازن وفيصل بعود عشان يظهرون يسيرون بيت قوم اهل ثريا لانهم حددوا اليوم عشان يسيرون يخطبوها رسمي وطبعا عمتي بجت لانها تذكرت هاني وتمت تدعي له وانا ومزنه حاولنا نخفف عليها ونقول لها انها تفرح لمازن .

وتمينا نترياهم لحد ما رجعوا وطلع مازن وفيصل كل واحد غرفته إلا عمي يلس عندنا وقال لنا تفاصيل سيرتهم من اول ما وصلوا بيتهم لحد ما رجعوا من هناك وكانت عمتي مستانسة بالقو وفرحت اكثر لمه قال لها عمي انهم حددوا موعد الملجة اول اسبوع من رجعة طارق اخو ثريا يعني بعد اقل من شهر .

الريم بصراحة ما استغربت تصرف مازن انه يطلع غرفته ويتجاهل وجودنا لانه هو ما تجاهل وجود الكل تجاهل وجودي انا خاصة بعد اتصالة الاخير فيني واللي انا قررت اني اتجاهله بس للاسف شكلي ما قدرت ها المرة اتجاهلة .

في الجامعة

كنت يالسة في الكفتريا لانه بصراحة ما كان لي خاطر ادخل محاضرات وما كان بعد لي خاطر ايلس في البيت لان مازن ولد عمتي عنده اجازه يتجهز للملجة الحبيب وانا بصراحة علامة الاستفهام اللي كبر الدنيا فوق راسي بصراحة خلاص شكلي بسأل مازن شو هو الشئ اللي شجاعته تخونه انه يقول لي عليه ...

ووسط افكاري الجهنمية هههههههههه حسيت بظلمة ورفعت راسي اطالع بلاها الدنيا صارت جي وما شفت غير بنت ما ادري يمكن وزنها مائة وشئ واقفة قدامي(لازم تظلم الدنيا ههه) قالت لي بصوت عكس جسمها سبحان الله انتي الريم؟؟؟

الريم : تذكرت مسرحيات عادل امام في ها اللحظة بس انا في موقف جد الحين ولازم اخفي البسمة اللي شاجه حلقي الحين وله لو عطتني كف ها البنت ما اعتقد اني برجع للحياة هههههه وقلت لها نعم (اوني مخلية نفسي شجاعة)

البنت : عطتني ظرف وسارت عني

بصراحة ما تجرأت ازجرها ومسكت الظرف وتأملته وايد بس ما كان لي خاطر افتحة لانه بصراحة ما خاطري اتفاجأ باي شئ ويمكن خذيت الموضوع ببساطة حطيت الظرف في شنطتي واتصلت على فيصل عشان يجي ياخذني خلاص مب قادرة ايلس جي في الكفتريا ما فينا على شئ ثاني يصير .

فيصل اعتذر انه يجي ياخذني يعني شو ؟؟؟

يعني يا شطار ان مازن هو اللي بيجي ياخذني من الجامعة يا ربي يعني انا ناقصة؟؟ وحسيت بلوعة جبد بصراحة وخوف وحسيت ان كل آلم الكون تجمعت عندي بس ما فيه حل قدامي غير اني ارضخ للامر الواقع واول مرة احس انه وصل بسرعة ركبت يمه بعد ما سلمت عليه وتميت ساكته وشكله هو متجاهل اني يمه في السيارة وما صدقت على الله اني اوصل البيت اوني بسأله شو اسأله وانا يوم اشوفه احس بخوف هههههههههههه


شفتوا الهدية لمزنه ههههه عليكم واحد

يا تري بيتم زواج مازن وثريا؟؟

مزنه منو بتختار حسن وله خليل؟؟

الريم ليش حست بضيق بعد خطبة مازن؟؟

واخيرا منو البنت اللي يات لريم وعطتها الظرف؟؟

والظرف اصلا شو فيه؟؟

بنعرف كل ها الاحداث في الاجزاء الياية