فز الخفوق وقلت يالله عسى خير=اثـر الليالـي غايـب قمرهـا
في شوفته نشوه وفزه وتحذيـر=وعيون خـلان تعانـق نظرهـا
ياصبح عمري ياصباح التباشير=نوره ملا قلبي وروحي غمرهـا
عقب الفراق اللي تعدى المحاذير=بين غصون القلب جافي دهرها
ربع بروحي عقب ماهي معاسير=سحابه هلـت بقلبـي مطرهـا
واسقي بها زرعه هوانا بتقديـر=غرسة غرام بالمحبـه بذرهـا
ياناس احبه والمحبـه مقاديـر=هذا هوى نفسي وهـذا قدرهـا
والحب ماله ياهل الحب تفسيـر=قلبيـن والله بالمحبـه امرهـا
لاجيت اصور حالة الحب تصوير=وارد عن حالي لخلـي خبرهـا
لقيت وجدي فوق كـا التعبيـر=كل الشعر قطره وروحي بحرها