يا هاجسي خلّك على خبري العــــــام = متربعٍ فوق الرجوم الطويــــــــــــــــله
والشوف لا تثنيه وأسحبه قـــــــــــدّام = خلّه يتابع له علومٍ جميــــــــــــــــــــــله
وأحسب حسابك قبل ما يحضر السآم = ويقص مرموق الروى من الخميـــــــله
وأنا تراني ما تغيرت لــــــــــــو دام = ظلم العداء والصبر عندي وسيـــــــــله
صحيح ما نمشي على رؤس الأقـدام = ولا سعينا في دروب الفشيـــــــــــــــــله
لكنها الأقدار وصلوف الأيـــــــــــام = تمطر علينا مثل وبل المخيـــــــــــــــــله
وأصحابنا فيهم حسودٍ وظــــــــــلاّم = من كثر ما به صار مثل الفتيــــــــــــــله
يشب ناره في تلابيب الأكمــــــــــام = ويحارب أصحاب النقاء والفضـــيـــــــله
مدري عنه ليش الزعل والتهجّـــــام = وأنا بري من ما بقلبه يشيــــــــــــــــــــله
ماني عدوٍ له ولا ني بشتّــــــــــــــام = ولاني بمن قد لمّ حوله شليـــــــــــــــــــله
أعامله بمعاملة دين الأســــــــــــلام = وأقول له كلٍ مشى حسب جيـــــــــــــــله
واقول له لا تشغلك كثر الأوهــــــام = وأحذر من أصحاب النفوس العليــــــــــله
تابع رجالٍ هرجهم زين وحشــــــام = ناس طبايعهم دوامٍ أصيـــــــــــــــــــــــله
منهم تلاقي شور في مجمله هــــــام = وفيهم مراويس وخبير ودليــــــــــــــــــله
وأيضا الشجاعه والصلابه والإقدام = كانوا بعصر فات كل وخيــــــــــــــــــــله
الرجل منهم قدم الأخصام ضرغـام = وإذا بدأ اللازم يساوي قبيــــــــــــــــــــــله
وأنا أنصحك والنصح ماهو بإلــزام = لكن بأهدي لك بيوتٍ قليــــــــــــــــــــــــله
لا يتبع الغاويين وأصحاب الأفـلام = ولا تسير مع القلوب الذليــــــــــــــــــــله
وأقول لك لا يخدعك زيف الأحـلام = وأحذر ترى الدنيا فتنها مهيــــــــــــــــــله
ومهما غفل جفنك على ظلمك ونام = لابد ما تصحى على قلّ حيــــــــــــــــــله
ولابد من يومٍ تقف فيه الأخصـــام = ويقاضي المولى عميل بعميـــــــــــــــــله
سنّه وضعها الله ما بين الآنـــــــام = والحكم لله ما ندور بديـــــــــــــــــــــــــله