هيه ياللي ميسمك بين المحاني=لاتجور .. الله يرحم والدينك
لابرد بين الضلوع .. ولاكواني=لين خلاني .. رهينة راحتينك
الزمان اللي على كفك رماني=انجح الكيات .. والا ارفع يدينك
ساقني حظي وانا سقت المعاني=وانت مطغيك الحلا وإسراف زينك
ابتليت الشوق والشوق ابتلاني=لين صرنا من يسارك في يمينك
طحت من جور المحبه في مكاني=بعد ماصوبتني .. برموش عينك
ماتشوف الوجد وشلون احتداني=كلما سجيت قال القلب .. وينك ؟
كلما قفيت عنك .. اجيك عاني=وانت مغريك الغلا .. بيني وبينك
لو تشوف اللي من اسبابك .. دهاني=كان قلت .. الله على نفسك يعينك
ماجرالي منك يالغالي .. كفاني=افتح الابواب .. وافرج عن سجينك
لاتحاسبني على غلطة زماني=وانت غالي عندي .. الله لايهينك