هذي قصيده للشاعر حمدان المري في والده كتبها يرثي والده اللذي ينام في المشفى
للسنه العاشره ...الله يقومه بالسلامه

ياليت ابي يفتح عيونه إلى جيت
ويشوفني من طيحته وش جرا بي

عايش لكن لاني بحي ولا ميت
اجيه واعود وهو ما درا بي

اصبح بقلبي وافقده كل ما امسيت
نصه معي والنص الاخر مع ابي

اطلع من المشفى ولا اقبل على البيت
الا وانا ودموعي تغرق ثيابي

يا بيت عقب العود ويش انت سويت
غياب ابي ماهوب يشبه غيابي

انا لاغبت سنين ما كــني ابطيت
وابي لا غاب ايام بان الشقا بي

أجامل الزوار واضحك يا بلفيت
وانا طواني الموت من حر ما بي

من اللي يقول اني ضحكت وتقهويت
من اللي يقول اني فرحت بشبابي

انا اتقهوى دمع واضحك تناهيت
ما يندرى وش عيشتي من شرابي

اجحد و وجهي فيه من حر ما اخفيت
من شافني من الناس شاف البلا بي

كن شوف بيبان العنايه توابيت
تدعيني لقبري وتطوي حسابي

تكسر عزومي والى رحت صليت
ارفع يدي لله يجبر مصابي

عاشر سنه لاني بحي ولا ميت
ابكي على حاله وهو ما درا بي

اصبح بقلبي وافقده كل ما امسيت
نصه معي والنصف الاخر مع ابي


اسأل الله ان يوفقنا للبر بوالدينا
انه هو الهادي