حي الله اللي معدنه رده عن دروب الهوان=قدم رضى ربي على داع الهواء لين اهتدى
ونعم برجال لطيب الفعل ما راوغ وخان= دعاه راع الفن والترحيب من قلبه غدا
جاني كتابه واعلن استنفار شعري ثم دان=واركيت للمعنى وعبرت الخبر والمبتدا
وأسرجت خيلي في دجا ليلي وجو الشعر زان=واحرمت عيني حين ما جاني لذيذ المرقدا
الشاعر اللي له على وضح النقا بصمة ضمان=أركس هوا نفسه وعرف اللي يداويها بدا
لك في نبي الله يوسف نهج في ردع الزيان=ويا حظ من هو يا رفيقي بالميامين اقتدى
ما كل مزيون على دنيا الورى يعطي حنان=وابرا إلى الله كان يدفعني لنار توقدا
نصيحتي م القلب ما تأتي من أطراف اللسان=ابعد عن الخفرات بعد أقصى تبوك عن الهدا
وان كان زل بك القدم والا افتتنت في الحسان=فعلم ترى التوبة تكفر ما ضمرت وما بدا
لا تحسب ان اللي وقع في دربهم كسب الرهان=لا بد ما يتعب من اللوعة ولو طال المدى
وأنا حسب علمي طريق الشوق تدمير الكيان=خذيت فيها رحلة والبعد عنها سوددا
أنا أعرف إنك حر ما تحتاج من عندي بيان=لكن على قول المثل من لا يشاور ما قدا