هلا مرحبا وأهلين بالشاعر الزيزوم = مهندس يقدم حالي الشعر برقومه
راعي الأوله قرم ومن رؤس ناس قروم = يدير العلوم بعقل في شبه منظومه
ولاهي غريبه وأنت في موقفك قيدوم = مقدم رجال والوفاء بآن قيدومه
وطبع الرجال الصبر والهم ماهو دوم = يبدّله رب الناس وسعوده يدومه
صحيح أنت بعض أحيان مما حصل مهموم = ولكن ما تدري عن الغير وهمومه
تقول إن قلبي من زمان القهر مسموم = وأنا أقول قلبك ما بعد جآته سمومه
ترى يا وسيع الصدر في المجتمع مضيوم = من أقرب قريب له وكم ناس مضيومه
وأنا مثلك أعاني من الحاضر المشؤم = ولكنها تبقى بشر غير مشؤمه
يقول المثل كم واحدٍ ينحبس مظلوم = وأنا أقول كم ناس بلا حبس مظلومه
ومن لا يقدر كلمته يخطي المفهوم = يعيش الأسى والكل في هرجه يلومه
ولا فيه مخلوقٍ وجد من الخطأ معصوم = ومن يعتذر يبقى مع ناس محشومه
بعض ربعنا يا خوك علمه ماهو مهضوم = وبعض الأجانب عنده علوم مهضومه
وبعض الولائم عندي تشابه الزقوم = إذا جآت من رجال له نفس مهزومه
إذا من بدأ في السالف كنه المحموم = ومن عاشره تصبح له النفس محمومه
ولا باقي إلاّ شبه ما حافة القدوم = فصبراً جميل وكل كفٍ بقدومه
وتبقى العلوم علوم وأيضا الحلوم حلوم = ويبقى البطل طماح ويحقق حلومه