ياعين لاتستغربين الصد عـن بعـض الوجيـه=انا ليا صديتلي عن وجـه عـارف مقصـدي
انتي تشوفين الردي زوله مثـل زول النزيـه=ماتقدرين تميزين الـي النزيـه مـن الـردي
الناس تخفيها الثيـاب الاّ عـن القلـب النبيـه=اللي يميّـز فالبشـر ويعـرف فيمـن يقتـدي
وانا مجرّب عارفٍ صرف الريال من الجنيـه=واحسب حساب لخطوتي ياعين قـداّم ابتـدي
انا اعرف الرجّال وادري وش علي ووش عليه=وادري براع المصلحه من راعي الكف النـدي
وانا اعرف الوجه البشوش مخفّي القلب الكريه=يضحك وقلبه سم عقرب لو لبس ثوب اجودي
وانا اترفّع في كلامي عـن مخاطبـة السفيـه=ومن لاهـداه الله محـال مـن الاوادم يهتـدي
الطيب لو انـه بضاعـه كـان كـلٍ يشتريـه=لاكـن نجـمٍ عالـيٍ بيـن الثريـا والـجـدي
والطيّب اللي ياخذ الطالـه ليـا طالـت يديـه =ماهوب من يذكر بطيب ابوه و(ا)هوه مرتـدي
وانا الصديق الصادق ادوّر لذكره ليـن اجيـه=اتعـب علشانـه خطايـه بـاذلٍ كـل جهـدي
ان كان ماجالي شبيه اصير انا اللي له شبيـه=ان جاني ابشر بسعده وان جيته ابشر بسعـدي
ولاّ رفيق الضحك في وقت السعه والله ما ابيه=ماني بحاجة رفقته لوكـان اعيـش بمفـردي
ابوي وصىّ والولد يحفـظ وصيـة مرتجيـه= قال انتبه لاتصحب اصحاب المذلـه ياولـدي
ياعين هذا اكبر سبب للصد عن بعض الوجيـه=عساك ياعيني عذرتي عقب شفتـي مقصـدي