هذي القصة مأساوية حصلت لشخص اسمه سلطان بن رباح وكان له أخ لم تلده أمه أخ دنيا ودين هو محمد بن عقيل وللأسف ما تمكنت من معرفه اصولهم او مناطقهم مع اني اجتهدت بس للاسف وكانت صداقتهم على وضح النقا ومن كثر ما يكنه سلطان لصديقه محمد أسمى ابنه البكر محمد على اسم صديقه وكانو يحبون الصيد..

وفي احد الرحلات للصيد وفي وقت الظهر تقريبا كان محمد يجهز الغداء وسلطان ينظف السلاح ومن غير قصد وبدون علم بوجود الطلقة في مخزن السلاح انطلقت الرصاصة وصابت محمد في القلب والمشكله ما كان فيه احد يشهد بالشيء اللي صار
فعاد سلطان للديره وعلم بما حصل فتم ايداع سلطان في السجن بتهمة القتل وبدأت المشايخ والوساطات بالتوافد على أهل محمد عشان يسامحون عن سلطان ولكن بدون جدوى وصدر الحكم عليه بالقصاص وبعد تنفيذ الحكم ومصادفة ً أصبح قبر سلطان ملاصقا لقبر صديقه محمد ، وهذه القصيدة تحكي ما حدث بالتفصيل ولكن ما عرفت من الشاعر اللي قالها .


يا فلاح الهم خيّـم فـوق قلبي يا فلاح=كيف تبغاني اسولف وانـت خابرني عليل

ويش قولك في عليل ٍ في حياته ما استراح=تنتثر دمعة عيونه لا ظلـم الليل الطويل

حالته لا ما تباعد حال سلطـان الربـاح=بالخطأ راحت حياته والخطأ ماله مثيل

كان ويّا صاحبه اثنين في أرض ٍ براح=يطردون الصيد دايم من صبح لين المقيل

اجمعتهم صحبة الدنيـا على جد ومزاح=ما يهابون الليالي والحمول اللي تميل

ما قتل عامد ولكن ثوّر ابليس السلاح=بالخطأ ثار السلاح وين يلقى له دليل

انعقد سجنه وربعه تنتظر فك السراح=والأكيد انه سجين وما رضوا ربع القتيل

هل دمعه يوم صلى ركعتين فالصباح=في نهار الجمعة اللي من ثقيل ٍ في ثقيل

هلّل وكبّر ونفسه تذكر اللي راح راح=كان في ربعه عزيز وذلّه الوقت الذليل

لا محمد لا تهاني لا سعود ولا صلاح=كلهم كانوا على باله وهمّه في هديل

طفلة ٍ ما كمّلـت عامين صايبها كساح=وانتثر دمعه وحاله من سبايبها نحيل

حان تنفيذ القصاص وغطوا الراس بوشاح=وجاك سيّافه يشيل السيف ابو حد ٍ صقيل

ارتخى راسه وزاد الموقف الحامي صياح=بين نوح وبين دمع وبين صيحات وعويل

وارتفع صوت الحشود وزاده محمد وصاح=يا يبه تكفى دخيلـك تستمع قول الدخيل

يا يبه وشلون نصبر كيف نهجع بارتياح=وانت من دنيا عيالك ماخذك مر الرحيل

يا محمد هاك علمي واحفظه قبل المراح=انتبه لاخوانك وبالك عليهم لا تعيل

والله الله فالصلاة وفالصيام وفالصلاح=والله الله فأمكم والله لكم بعدي كفيل

غمّض عيونه ونفسه تطلب الله السماح=رافع ٍ سبابته مظلوم والله الوكيل

سل سيّاف الصفا سيفه ودقه ثم طاح=رأس سلطان المراجل وانتثر دمه يسيل

غسلوه وكفنوه وفاح طيب السدر فاح=وبالمصادف صار قبره جنب قبر ابن العقيل

يا فلاح الكارثه ما هي سوالف يا فلاح=خلني ساكت ودوّر غير هالقصه بديل


رحم الله الاثنان واسكنهما فسيح جناته وعفا اللهم عنهم
__________________