بوقت من البطا و بليل تتراقص شياطينه =بعد شفت الضيا ينزع من ثياب المسا ثلثين
تحايلت المنام اللي مثل بيتك تمرينه= و انا اللي من تفارقنا و أنا ما غمضت لي عين
غريبة كل حلم يمر برقادي تزورينه= و الاغرب كيف أحلم الحلم و ارجع و احلمه بعدين ؟
قبل يومين شفتك بالمنام .. و قمت من حينه != و نمت أمس ، و رجع نفس المنام اللي قبل يومين
أنا اللي قبل اسافر شلت قلبي من شرايينه=تركته في يدك مثل الأمانه ، و احفظيها زين
ترى حفظ الأمانه دين .. مجبورة تردينه=أجل ما فيه أحد قد قال لك حفظ الأمانة دين!
مرد المقفي بيلفي .. و يستوفي ، و توفينه=بعد ليله ، ثلاثه ، أربعه ، عشره ، شهر ، شهرين
إذا انتي ، ما انتي بقد الكلام اللي تقولينه=حرام .. استامنك حاجة ، و إذا جيت اطلبك تنسين
تخونين ، و تبين أرضى .! و أحد يرضى تخونينه!=أنا لاجيت أخونك ، مع حبيبة ثانيه ، ترضين .؟
من أول ما رجعت من السفر ماشفت لك بينه=و أنا اللي كنت أحسبك قبل ادوس ارض المطارتجين
تكونين أنتي أول شخص عيني تحتضن عينه=و كنت أتخيلك من زود فرحة رجعتي .. تبكين
و أشوف بدمعتك حكيك و أعرفه قبل تحكينه= و اجيب أحلى من اللي بتحكينه ، و أتركك تحكين
تقولين : الوطن نور ..و أقول بنور مضوينه=تقولي لي: غديت أحلى ، و أقول : عيونك الحلوين
كلامٍ نام بشفاهك .. و خفتي لا تصحينه= ذخرتيه لغرام اللي ينام ... و يتركك تصحين
تغانمتي غيابي .. لين رجحتي موازينه = تعلم من يدك لمس الكفوف و علمك رتجفين
و ليتك لاقية به شي .. فيني ما تلاقينه!=مهو بغرور .. لكن خابرك ما لك أمل تلقين
تغافلك بغلا .. و الإ الحلا مهو بمن زينه=تزينه الصور .. بس الصحيح ابن الحلال زوين
و أنا ماني بناقص عنه يوم أنك تبدينه=نصيبي .. هو نصيبي لو يسددها من الصوبين
قنوع بمظهري ، و السم ما يذبح ثعابينه=على قول المثل ما ني حلو .. و لكن ماني بشين
إذا أهداك الزهر مره .فأنا اهديتك بساتينه=و إذا ألهاك بفرح ليله، فانا تهت لبكاك سنين
و إذا استضعفتك أملاكه ... و شتتك ملايينه=أنا حتى فتات الخبزة أقسمها معك نصين
طموحي ، بس أجي و أظفر بشي تستحقينه= تدينته .. تسلفته .. سرقته .. مو مهم منين
كأني من كثر ما ارضى بكل اللي تمنينه= لو انك تطلبين الله.. يعنيني ، بقول آمين
أنا ما العب على الحبلين ،وقت الطيش و سنينه=تبين الحين يوم اني كبرت العب على الحبلين ؟
ترى عند البدو بالذات عيب اللي تسوينه= حلاتك لا عشقتيني .. تعشقيني ليوم الدين
غرامٍ نسكن ضلوعه .. حشيمه من مجانينه = جفا يجمع معزتنا. و لا عشق يذل أثنين
كثار اللي تحدوني و قالوا لي: تحبينه=امانه .. لا تخليني صغير بعينهم تكفين
لاني كل ماقالوا تخون.. اقول : مسكينه=عليك الله و أمانه .. علميهم من هو المسكين
أنا خايف ليا طاح الجمل تكثر سكاكينه=و أنا ما عادت ضلوعي تحمل طعنة السكين
مثل ماقالوا المكتوب واضح من عناوينه=لو ارحل منك للغربه باسافر من ظلامك وين؟
كفايه. كل حلم يمر برقادي تزورينه=كفاية .. من تفارقنا .. و أنا ما اغمضت لي عين
قبل يومين شفتك بالمنام و قمت من حينه= و نمت أمس ، و رجع نفس المنام اللي قبل يومين