المجلس اللي مايقدّرك راعيه = خلك عزيز النفس مالك وماله
لاصار ماحطت لجنبك مراكيه = تلقى من خيار المجالس بداله
مغنيك ربك عن قهوته وشاهيه = دام المعزب مايسرك قباله
دور على مجلس(ن) لاجيت ناصيه = حصلت خمسه من شروط الرجاله
تقدير في قلبه وترحيب يبديه = عقل(ن) وأدب ومبَهرَاتن دلاله
مجلس رجال العرف كل الفخر فيه = عنه الرخوم يقدمون استقاله
بعض المجالس محكم العقل توذيه =يلقى بها شخص(ن) كثير(ن)جداله
يفضح لسانه مايكنه بخافيه = زود(ن) على جهله سريع انفعاله
في رايه إن العلم عنده وحاويه = لوكان غرق في محيط الجهاله
وفي رايه إن الناس لازم تباريه =ولوفيه فرصه كان كبه ضلاله
شخص بليا دين لاتعتزي فيه = واسمع كلام مجرب الوقت قاله
كتاب حالات الرياجيل قاريه = وحصل بها أكثر من ثلاثين حاله
وصور بعضها ماتطرق لباقيه = ولو يشرح الحالات طوّل مجاله