ايامنـــا واليالي كــم نعــاتبهــا =شــبنا وشـــابت وعفنابعض الأحوالي
تاعـد مواعيد والجاهــل مكذبهــا =واللي عـرف حـدهـا من همها ســالي
اليا اقبلت يوم ما تصفي مشــاربها =تقفي وتقبل ومـا دامـت على حــالي
في كـل يـوم تورينـا عجــايبهـــا =واليوم الأول تراه احســن من التالي
ايـــام في غلبهــا وايــام نغلبها =وايـام فيها ســوى والدهــر ميـالي
جـربت الأيــام مثلي من يجـــربهـا =تجــريب عـاقـل ذاق المــر والحالي
نضحـك مع النـاس والـدنيا نــلاعبها =ونمشـي مع الفي طــوع حيث ما مالـي
كـم من علوم وكـم اداب نكســبهــا =والشـــعر موزون مثقــال بمثقــالي
اعـرف حـروف الهجـا بالرمز واكتبها =عـاقــل ومجنون حاوي كل الأشــكالي
قـوم ليا جيتهـا صكــت حـواجبهـا =وابـدت لي البغض في مقفاي واقبالي
وقـوم ليا جيتها رفـت شــواربهـا =والضحـك وقلوبها فيها الردى كالي
والـروح وش عـذرها في تـرك واجبها =راح الحسـب والنسـب في جمع الأموالي
المــال يحيي رجــال لاحيـاة ابهــا =كالسـيل يحيي الهشيم الدمدم البالي
عفـت المنـازل وروحي يـوم اجنبهـا =منها غنيمـه ومنها البعـد اولالـي
لاخير في ديرة يشــقا العزيز ابها =يمشـي مــع النــاس في هــم وإذلال
عـز الفتى راس مالـه من مكـاســبها =يامـرتضي الهـــون لاعـز ولا مـالـي
كـب المنـازل وقـل للبين ينــدبها =تشــكي عليها بدمـع العيـن همّـالي
لاتعمـر الـدار والقـالـه تخـربهـا =بيع الردي بالخسـاره واشــتر الغالي
ما ضــاقت الأرض وانســدت مـذاهبها =فيها الســــعه والمـراجل والتفهلال
دار بــدار وجيــــران نقـــاربهــا =وأرض بــإرض وإطـــــلال بإطــــلال
الناس اجـانيب ليـن انك تصــاحبها =تكون منهم كما قـالوا بالأمثــالي
الأرض لله نمشـــــي في منــاكبهـــا =والله قــدّر لنـاارزاق واجـــالـــي
حـــث المطــايا وشـــرقها وغــربها =واقطــع بها كل فــج دارس خـــالــي
واطعــن نحــور الفيافي مع تـرايبها =وابعد عن الهم تمســي خـالي البالي
لـو مــت في ديـرة قفــر جــوانبها =فيها لوطي الســباع القبس مـدهـالي
اخيـر مـن ديـرة يجفـاك صــاحبهــا =كـم ذا الجفا والتجـافي والتحـلالي
دوس المخــاطـر ولا تخشــى عــواقبها =والمــوت واحــد ولا عنـد الخطر جالي
ان المنيــه ليا مــدت مخــالبهـــا =تدرك لو كنت في جو الســماء العالي
رب الســــماوات يامحصي كــواكبهــا =يا مجري الســفن في لجـات الأهــوالي
ضــاقت بنا الأرض وأشــتدت شــبايبها=والغيـث محبـوس يامعبــود ياوالــي
يالله مـن مـزنــة هبـت هبــايبها =رعـادها جـاتله بالبحــر زلــزالي
ريـح العـوالي من المنشـــا يجاذبها =جـذب الّـدلي مع جبا مطويـة الجـالي
ديمومة ســبلت وارخــت ذوايبهـــا =وانهـل منها غــزير الوبـل همّــالي
تســقي ديار شــديد الوبـل حـاربها =ماعــاد فيها لبعض الناس مــدهالي
ياجـاهـل اســمع تماثيــل مــرتبها =فيها معاني جميع القيــل والقــالي
مثل المحــابيب زادت في قــوالبها =في صـرفها زايده عن قـرش واريــالي
يـارب توبــه وروحي لا تعـــذبهــا =يـوم القيامه اذا ما ثقلت اعمـالي
وازكـى صـلاة على المختــار نوهبهـا =شــفيعنا يوم حشــر فيه الأهــوالي