فمان الجرح لا والله فمان احزاني الكُبرى=فمان اغلى ثلاث سنين مِتّ بْها عشان اعيش
فمان الحب واحلام القلوب البيض والخضرا=فمان الآه من كثر الزعل والشوق والتطنيش
فمان عيونك اللي مالها بين العيون .. اُخرى=فمان غرورك اللي علّم الطاووس نفْش الريش
فمان عطورك اللي تسكن انفاسي وبالأحرى=فمان انفاسك اللي تسكن عطوري ومدري ليش؟
فمان الليل واحضان الدفا ومصافح القمرا=فمان الباب والشبّاك يوم اواعدك .. ونطيش
فمان التوت والرمان واحلى فاكهه حمرا=فمان الضحكه اللي كنّها من مبسمك .. بخشيش
فمان غيابك اللي ما ترك لمْواصلك .. بُشرى=فمان الشك وظنون الخطأ والكذب والتشويش
فمان العيد .. كنّي به يجيني وحالتي تزرى=يطبْطبْ فوق أكتافي حزن ويقولَ لِي "معْليش"
فمان الجوع واحساس العطش ومفارقك صحرا=تعبت افتّش ْلواحاتها .. واضناني التفتيش
فمان ضلوع مكتوب ٍعلى أنحاءها اليُسرى="هُنا توجد جروحي" لو تكرّمتي: بلا تنبيش
فمان دموع لا تُسمن ولا تُغني من الذكرى=وانا اللي ماقدرت اطلع من اجوائي معك بشويش
فمان الشارع اللي كلّما جيته .. وانا أقرا=معاناتي من اوّل يوم في وصلك إلى التهميش
فمان الشاعر اللي يجمع بتجربْته الصغرى=فكر بدْر .. ورومانسيّة نزار .. وفلسفة درويش
فمان العاشق المجني عليه .. بتسلية عذرا=من اوّل "بعشقك" حتى نهاية "ما تصبّرنيش"
فمان الخوف ويدينك جنود وأضلعي أسرى=وانا فيني من الإحباط ما يكفي هزيمة جيش
فمان اشياء ما تنقال للعالم .. ولا تطرى=ممالك حب .. دمّرها اللعب وسْياسة التطفيش
فمان الإيش؟ ما أدري ولكنّ الزمان ادرى=وانا اللي ضاع ما يدري حبيبه ضيّعه لجل ايش؟
فمان الله ياقلبي مع انّك جرح ما يبرا=كتب ربّي عليّ اعيش من دونك (وانا ما اعيش)