لا ضاق صدرك عالي الصوت جره..
لو كان قلبك ما يطاوعك مسرور..
دنياك لو تسوى من الحزن ذرّه..
ما كان تاليها توابيت و قبور..
و ما كان للكافر بعمره مسره..
وما شفت في ملكه ملايين و قصور..
العمر يمضي بين حلوه و مره..
والموت حق و قابض الروح مأمور..
دام الحياه الفانية مستقره..
ورزقك يجيك و بين الأجواد مستور..
لا تنشغل بالوقت برده و حره..
واحذر تصير بقسمة الناس مقهور..
و حكم القدر لا جاك خيره و شره..
اشكر عظيم الشان و الذنب مغفور..
والمجلس اللي يزعجك لا تمره..
خله تراك بشوفته ما أنت مجبور..
والرجل سقها في صحاصيح بره..
ومد النظر ما بين ريضان و زهور..
لا صار وجه القاع ما فيه جره..
والمشي حافي و الثرى تو ممطور..
ساعات صمتً ما وراها مضره..
تسوى الكلام اللي به ذنوب و شرور..
اطلق خيالك و اترك النفس حره..
وخل الطبيعه في حياتك لها دور..
و بالليل لا بانت نجوم المجّره..
أذكر بديع الخلق بـِ إحساس و شعور..
واسجد لرب الكُون مره و مره..
وإحفظ لسانك و اترك الكذب و الزور..
وفروض ربك خلها مستمره..
وطاعتك لا يدخل بها نقص و قصور..


وسلامتكم...