الصبر يا بيشة لو الجرح جرحين=في بن جميع و بو علي كلها اقدار
الجرح غاير ينزف الطاق طاقين=يالله تعين اللي على الفقد صبار
اكبودنا متفتته لاجل الاثنين=و عيوننا ذابت من الدمع مدرار
ما به ملامه لو بقينا حزينين=الي فقدناهم عزيزين وخيار
كل الخساير هينه ما عدا الدين=واهله و رافع رايته عز واصرار
يا بيشة الفيحا ديار المحبين=في الله صبرك عاالبلاوي والامرار
الاجر ثابت و الشدايد تبي اتلين=ويعوضنا من يعلم السر وجهار
واحبابنا عالخير كانوا مقيمين=واعمالهم تشهد بها الدار والجار
ما مثلهم يبكى و تدمع له العين=المثلنا يبكى لتقصير واصرار
ولا زلت بارثي حالنا يالفهيمين=ابليس يرمينا على الخزي والعار
غفله وربكه هايجين مجانين=واليا وصلنا للصدَقْ ما به اعذار
وإلى متى التسويف و كلام بعدين ؟=العمر يجري والمقادير زوار
يالله يا رحمن يا قاضي الدين=اغفر لنا ولهم و با عد بنا النار
ويا الله ثبتنا على الدين و تعين =حتى نلاقيك و كتبنا فالابرار