يا غبر الأيام وجهك وجه متحدي=وانا اترجاك ما ليلٍ ضحك فجره
إلى متى والحزن وسمٍ على كبدي ؟=متى يجي يوم ما أصبح به على حسرة ؟
ليت الليالي تعاملني على قدي=قصير حبلٍ يقضّي بالرجا عمره
ترميني بهمٍ أكبر من مدى جهدي=قلبي صغيّر وهو يا الله وش كبره !!
يا اللي تدوّر سواليف الونس عندي=ما عاد للضحك في قلبي مدق إبرة
الله يرضى عليك تسيبني وحدي=شف كثر هالخلق ، حاول ، شوف لك دبرة
أبي انفرد بصدقاي اللي لهم عهدي=هذول أعز أصدقاي : البحر والصخرة
آثق بهم حيل وآبيّح لهم سدي=من وين تلقى كذا .. من يوسعك صدره
حتى القصيد القصيد موقفٍ ضدي=تنكرت لي حروفه جعلها العثرة
شعري طريقٍ لكل أوجاعي يودي=ما اللي خبر شاعر ما يوجعه شعره !؟
إذا نزفت القصيدة من قصى حدي=ما عاد خليت في جرحي ولا قطرة
زمان يوم الشعر في عسكري جندي=كنت أحسب أن الهدف بس " اكتبه واقره "
أثره سوادٍ سكن في عالم وردي=السم في باطنه والشهد من ظهره
خيال عاجز مثل الاحلام ماتمدي=وش فايدة من تعرف أن مولده قبره !؟
مجرد أسحب خيالاتي على رشدي =ظهر لي العالم اللي كنت مختصره
هذي غيومي وذا برقي وذا رعدي=متى يطيح المطر ؟ بكرة ورى بكرة ؟
موعدني الحظ خير وطال بي وعدي=ما شفت نصفه ولا ربعه ولا عُشره
أنا اتعزز كذيّا ..وافتل بزندي=والآدمي يعتريه الضعف بالفطرة
ما تستحي الدمعة اللي باغتت خدي=بغيت أعيّي ، وهي طاحت وأنا مُكره
ما والله تطيح لو الامر في يدي=ينهد راس الكريم ودمعته عبرة
يا قلبي المشتقي ودك وأنا ودي=كثرت شجون الحديث ..إلا على فكرة ..
طولت اسولف معك والحكي ما يجدي=تصبح على خير.. ولاّ اصبح على حسرة