جاني خبر ضيق على البال فحواه
يقول نايف مات والعلم موكود
قلت آه من فرقاه ثم آه ثم آه
اللي يسد بخانته غير موجود
ياكبر فقدانه على الدار كبراه
سد منيع انهار من قبله اسدود
صلب برايه والعدا ماتحداه
وحكيم مامثله مع الناس ياسعود
تبكي عليه المملكه عقب فرقاه
وكل الخليج وكل من يطلب الزود
من هيبته في دارنا الامن عشناه
واللي بقلبه حقد لوعاش مضهود
يارب عوض بخير ياالله ياالله
واحم الوطن من كل فاسق ونمرود
شعر/ سالم حويفظ المطيري