ياناشدٍ عـن حبيبـي ويـش تبغابـه
أنا حبيبي مـن الصعبـه تعرفونـه
//

أنا حبيبي حضور الوقـت وغيابـه
بعطيكم شوي من وصفه ومن لونـه
//

رجال كل الفخر والطيـب بأشنابـه
وأشوف روحى وموت الناس بعيونه
//

شخصيته تختلـف وأحيـان تتشابـه
ومرات أجي من وراه ومر من دونه
//

وأموت بالخوف لامن ثارت أعصابه
وأليا هدا صرت له بالحكي ملعونـه
//

اهتم في كشخته مـع سكبـة اثيابـه
واقوله لامشي يمشي علـى هونـه
//

أغار من نظرةٍ تاقـف علـي بابـه
وأغار من كـل جيرانـه يشوفونـه
//

وأغار من جلسته في لمة أصحابـه
وأخاف مايذكرون الله .. يحسدونـه
//

ويغيضني حيل والله كثرت أحبابـه
هذا وأنا أدري بأنـي ماليـه كونـه
//

وأخاف يثّر عليه الوقـت وأسبابـه
ويصدق اللى على مثلـي يقولونـه
//

هذا حبيبي وهذا شكـل .. هندابـه
وأنا بعد ماعلي حلوه .. ومزيونـه
//

متحمله شرهته وأرضـاه وأعتابـه
وبكـل مافيـه مغرومـه ومفتونـه
//

أضيق من ضيقتة وأموت وأحيابـه
وأصير في غيبتة طفقـه ومجنونـه
//

هذا بكل أختصـار وتكفـي الجابـه
وأدري بعد مستحيل أنكم تعرفونـه

*هنوف الشعر