قالت علامك تلبس شماغ وعقال،،
انت بدوي قلت بدوي من حموله..

مالبس بناطيل لها الوان واشكال،،
ومتر الشارع بعرضه وطوله..

قالت اجل راعي معاميل ودلال،،
شرب القهاوي تحسبونه بطوله..

قلت اسمعيني وافهمي كل الاقوال،،
تمعني في كل حرف أقوله..

كيفي يابنت الحضر بالله فنجال،،
وحليب خلفه بالمراح معقوله..

حب الكرم والجود وعلوم الابطال،،
مغروز فينا من زمان الطفوله..

قالت ترى بنت البدو حضها مال،،
قلت 'اعقبي.حذراك تكوني جهوله..

بنت البدو يابنت مضرب للأمثال،،
غير الجمال وطاعت الله خجوله..

زينه على كل المزايين تختال،،
مثل القمر ينشاف محد يطوله..

ماحطت اصباغ ولاحطت ظلال،،
ولاسيرت في السوق سير مهبوله..

ماتنخدع بكل ماكر ومحتال،،
الي لهم في السوق صوله وجوله..

تحمى شرفها خوفت القيل والقال،،
درب الدنس والشين ماهي بحوله..

ريميت ٍ ماصادها كل ختال،،
حتي من نسيم الهبايب جفوله..

هي مهره تصعب على كل خيال،،
وانتي ومثلك عسفهن بالسهوله..

قالت تغزلبي شف حبت الخال،،
ناظر عيوني والرموش الكسوله..

وانظر جديل فوق الامتان ميال،،
ومبسمآ يعجبك تنظيم لوله..

قلت العفو مايستوي زين وهبال،،
والي تبينه شي يصعب حصوله..

قلتي وقلت وكلمه الصدق تنقال،،
والزين ماهو من شروط الرجوله..