يالله يا مسقي الحيا من مخايله=يالواحد اللي ما تعدد فضايله
يا خالق ابن آدم وكاتب منيته= يا محصي اقواله ومحصي عمايله
تغفر لمشرف طيب الذكر والنبا=اللي على دينك تربّت شمايله
الآدمي موجز حياته ختامها=واواخره تنبيك عن حال اوايله
ومشرف بعيني شفته يموت مبتسم=ما اقول ذا قاله ولا ذاك قايله
ويفوح فوح الطيب جسمه ومبسمه=والروح فاضت كنّها المسك سايله
لو ادري انالميْت بالحي يفتدى=ولو ادري ان اليدّ للروح طايله
ل اعطيه روحي والذي باقيٍ لها= وآجي لقبره وارتمي في نثايله
لكن تبقى قدرة الله نافذه =والكون زايل والمخاليق زايله
آمنت باللي كوّن الارض والسما= وايقنت بن النفس لله آيله
النوم شد وحل في عيني السهر=لا نمت في ليلٍ ولا نمت قايله
والقلب يحمل بالغ الحزن والاسى=عليك يا شيخٍ تجلّت فعايله
راعِ الجمايل راعي الطيب والكرم =ما تنحصي لو قلت ب احصي جمايله
كم جايعٍ بيموت من بعد موتته=وكم اسرةٍ بتجوع بعده وعايله
عن فعله الواجب وعن وصله الرحم=ما وقّفت له سود الايام حايله
وان عجزوا اعن الحمل شيالة الثقل=وكلٍ رغى والحمل ما جاه شايله
برك لها مثل الجمل ثم شالها=ما قال معتدله ولا قال مايله
اللي يموت ابوه يصبر ويحتسب=لو كان ما بين الخلايق بدايله
واللي يموت اخوه يختل ماقفه=تكْسر مجاديفه وتنفذ وسايله
وان ماتوا الاثنين في نفس واحدة=مصيبة تاقع على النفس هايله
يارب تغفر له ذنوبه وترحمه=وتثبته بالحق لا جاه سايله
وانك توسّع داخل القبر مدخله=وفي جنة الفردوس تجعل نزايله
واهله تصبرهم وتجبر مصابهم=وتخفف احزاني وتقبل دعاي له