يابو وليد القلب فيه ارضوض=واحس وسط الراس شضّاضّي
اتقول في وسطه زواج فيوض=وازعاج طبالٍ وعراضي
ويحن صدري حن جمس الحوض=لا دست له والقير في الفاضي
مما جرالي حايرٍ ممروض=كني حبيسٍ تحت الانقاضي
يا صاحبي ماهو من المفروض=تخطي عليه ثم تغتاضي
لوما جنابك عندنا محفوظ=ما فاح جاشي بالتهيّاضي
خوتْك تسوى بنك بن محفوظ =والراجحي وبنوك الاقراضي
والفايض من النفط والمعروض =واللي بعد في وسط الاراضي
بس الجفا بعد الوفا مرفوض =في وقتنا الحاضر وفي الماضي
ابطيت اخايل للبروق تنوض =وابطى عليّ البرق ما ناضي
وجهك عبوس وحاجبك مقبوض=من شاف وجهك يحسبك قاضي
وما دام مالي فالزمان حظوظ= والديك لا ولّد ولا باضي
بوضح المعنى بدون غموض=ياللي لبست الثوب فضفاضي
عهد المودة بييننا منقوض=دام المصلي بك ماهو واضي

المشاركة الأصلية كتبت بواسطة أبو ريان (المشاركة 1007281) خالد بن مشرف .. أنت أستاذ بصراحة وشاعر بارع ورائع ومقنع وكل ما يمكن ذكره موجود .. يبدولي إنك كتبت هذه القصيدة بمزاج فيه غموض ومحتار كيف توصف ما بداخلك تجاه أبو وليد .. باقي الأمور في القصيدة بناءً وخلاف ذلك قمة ولله درك .. دائماً تُطرب بقصيدك وهذه حقيقة .. صح لسانك وطاب حالك ولك تقديري ..

المشاركة الأصلية كتبت بواسطة فارس بني عمرو (المشاركة 1007287) خالد بن شرق صح الله بدنك قصيده تستحق التقدير عــهــد الــمــودة بيـيـنـنـا مـنـقــوض دام المصـلـي بـــك مـاهــو واضـــي

المشاركة الأصلية كتبت بواسطة المسكت (المشاركة 1007290) رائع بكل شي الا بوجه القاضي لآنهم إن شاء الله فئه محدود اللى ينطبق عليهم ذلك الشطر او البيت سلمت ودمت ولاعدمناك إحترامي

بـوضـح المعـنـى بـــدون غـمــوض=يالـلـي لبـسـت الـثـوب فضـفـاضـي
عــهــد الــمــودة بيـيـنـنـا مـنـقــوض=دام المصـلـي بـــك مـاهــو واضـــي