منتديات بني عمرو - جروح القلب

جروح القلب

يلعبي الهوجاس والهم والدين
والقلب عيّا من جروحه يباتي

بأسباب ناسٍ غدرهم بالسكاكين
بيّن عليهم عالم الخافياتي

صورة بشر والاّ الحقيقة شياطين
افعالهم تنعد في الموبقاتي

منها الربا والسحر ومفرق البين
وقذف بغير الحق للمحصناتي

ماهمّهم فعل الضرر بالمساكين
اللي تشتتهم ظروف الحياتي

ولا دروا بمرجّحات الموازين
والعاقبة والذنب بعد المماتي

والله رقيب وراد للخافي ايبين
والوقت لف ودار مثل الرحاتي

مثبت عليهم بالحجج والبراهين
ولا يفيد الصوت عقب الفواتي

وين القيم عن مايسوون والدين
وين الحمية من هروج الشماتي

وين الشهامة والصلة والشيم وين
وين الرجال اللي ترد الغزاتي

اصبر ومومن وادري ان الغبن شين
والصبر زين ويفرج المكرباتي

وانا من ارجال زحولٍ مسمين
والحمد لله ماتغير صفاتي

امشي على وضح النقا في الميادين
عندي ثقة مافية شكٍ بذاتي

شاعر واثمن كلمتي بالدواوين
ما ابدا على شان اتبع القافياتي

عهدٍ علي ان ادبل الصاع صاعين
واللي بصدري لو يطول بياتي

حتى ولو ياخذ له اشهور وسنين
ان قاله الله خالق الكائناتي

حطيتهم عبرة ودرستهم زين
درس يخليهم سنين شتاتي

وختامها يأهل الوفا قولوا امين
وقت المنام وعند وقت الصلاتي

الله يورينا بهم مقلب شين
والله يعرضهم سيوف العداتي