ياعايشه من قال ذا عيش كذاب=وش ياخذ الشبعان من ذمة الجوع
ياعايشه والسالفه ماهي أنساب=ولاهيب عادات وتقاليد وطبوع
ياعايشه لو هي على فاس حطاب=كان الحطب مبطي من السدر مقطوع
مخدوع ياللي يحسب الوقت له طاب=واللي يصدق جاير الوقت مخدوع
والكلمه اللي بالنحو مالها إعراب=مرفوعة بالنصب أو رفع منصوب
نتبع ورى الممنوع مانحسب حساب=ورحنا بقولة (كل ممنوع متبوع)
عذر الدموع اللي تحرش بالأهداب=لو عاد فيه أهداب تتحمل دموع
ماكان بعتك يالرضى بأشري عتاب=ولا رحت مبسوط وعودت مفجوع
يمرني الإسبوع وجروحي زهاب=ويروح وأنا أعد بأيام الإسبوع
حتى لو إنا أهل وديان وشعاب=أو حبنا ع الوسم مذري ومزروع
في ذمتي ماعاد به ذيب طلاب=والضان بين مصوب وبين مصروع
ياعايشه والناسك اللي بمحراب=يشهد له المحراب وخشوعه خشوع
لومك على العرقوب ياعضة الداب=الطامنه تفهق ليا طّروا طلوع
ياعايشه والجوع له شلف وحراب=حتى الرغيف أصبح مثل حبة الكوع
ومقطوع مثلك ماله أحباب وأقراب=ياعايشه ماهو من الله مقطوع
رزقك على رب ليا انصكت أبواب=يفك باب لكل مبلي وموجوع
من قال محد يموت من الجوع كذاب=وش عرّف الشبعان كم مات م الجوع

المشاركة الأصلية كتبت بواسطة المسكت (المشاركة 437124) إختيار موفق حلوة الروح من أجمل ماقرأت مؤخراً سلمت يداك ولاهنــــتي وصح الله لسان شاعرها يعطيك العافيه ولاعدمنااك اخووك

المشاركة الأصلية كتبت بواسطة الرافعيB (المشاركة 437130) صح لساااااانك ويعطيك العافيه