يقول أبو عابد يعزي سنينه = وأثر العزى له في ربوعه وسبته
يا زين طعم النوم يا زين زينه = لا حل في وقته وفي غير وقته
لكن ما يعقبه يا شين شينه = والله لو ينباع لي كنت بعته
كالخمر ما يروى منه شاربينه = من بعد شربي له وش اللي ربحته
أنا أشهد إنه للنشاما مهينة = كم راس قوم بسبته طاح بشته
حتى متى يا نفس لا ترعوينه = حتى متى وأنتي على جور كبته
حتى متى وأنتي لحكمه مهينة = انا اشهد إن بطاعتك له حسدته
الله أعلم ويش بينك وبينه = كلاكما ضدي بشرٍ جهلته
يا نفس انا صاحبك ذا تعرفينه = إللي من أجلك كل غالي وهبته
باقي ويبقى مثل ما تخبرينه = لو تطلبين الصعب لأجلك سهلته
لأجلك يضيع صاحبك نصف دينه = كم ذنب لأجل أرضيك قمت أرتكبته
قالت يابو عابد عليك السكينة = إمن العذل تبرى وفيني نشبته
ربي جبلني طايعة لك ذعينه = لكن ميلي للهوى وأحتضنته
خيّرك نجدين ونق السمينة = وانا معك في دربك اللي سلكته
لاني بديانه ولاني مدينه = هد النظر يا صاح فيما حسبته
وش عاد عذري بعد رجح الوزينة = أحسبني الراحج وليتي عدلته
حكيمة يا نفس فينة وفينة= حكيمة ما كان لي فيك مقته
والله لو لا حانث في يمينه = لأحلف لأروضها إلا حين تنته
لكن نعيش ويومنا عايشينه = والغد عند الله بغيب جهلته
وأعيد وأكرر بنبرة حزينة = وأنساك يا علم بليلي سربته
يا زين طعم النوم يا زين زينه = لا حل في وقته وفي غير وقته

المشاركة الأصلية كتبت بواسطة المسكت (المشاركة 389418) ابو عابد يعطيك العافيه والله وكلك ذووق يالغالي اصدق الود لك ودمت بكل سعااده اخووك

المشاركة الأصلية كتبت بواسطة ابو ريان (المشاركة 389635) أبو عابد .. صح لسانك .. والقصيدة كعبرة وتحاكي أمور كثيرة .. بارك الله فيك ولك التقدير ..

المشاركة الأصلية كتبت بواسطة الحميدي السبيعي (المشاركة 390392) ابو عابد يعطيك العافيه وصح لسانك

المشاركة الأصلية كتبت بواسطة ابولينا (المشاركة 390407) ان اشهد القصيدة ورعايه احلى من ذوق العسل في مناحيله مشكور ابو عابد على القصيدة الجميلة