الريال رخيص واللا وش بلاه = ما عد يساوي عُشر ما نخبره
في رغد والنفط عالي مستواه = وأمن وإطمئنان مال ومقدرة
وش حصل ؟ وش رخصه بعد الغلاه = والله إنه سوء ماحدٍ ينكره
عالمياً عاليا بأعلى سماه = داخلياً هابط في المقبرة
يالذي عنده خبر عطنا نباه = علّها العالم بعذرك تعذره
ترجموا ما حل في دار الغناة = وأفهمونا من بكبره صغّره
علمو المحتاج ذا ما شبع فاه = لأجل يشبع له صغارٍ تنظره
يرقب أخبارٍ تسره في القناة = يوم لا راتب ومالٍ يدخره
علموا الثكلا على إبنٍ ما وراه = وأرملة في كل هم مبحرة
طفلها يشكي وتبكي من بكاه = من سوى أطفالٍ على ذمة مرة
علموا العاطل على أقدامٍ حفاه = من كثر ما دوّر اللي يستره
كم يكافح للشهادة من صباه = شرب ماها بعد ما شاب إشعره
علموا المديون وش ذنب جناه = زدتو ديونه ديون مشبرة
قصد الراتب ولا يملك سواه = غارقٍ في غبته حتى نحره
فهموهم وإفهمونا يالحماه = كيف هذا الحلم ماحدٍ عبّره
البنات كثار يالله النجاة = ثم جات هذي وقصّت تذكرة
ما بيقنعنا من تلوّح يداه = ثم جاب البربرة والثرثرة
قال عاداتِ قديمة ما نباه = وش يبي يا جعل بقعا تقعره
يا ولاة الأمر يا شم الجباه = يا ملوكٍ حكمها شق إشعرة
بعد ربي مالنا عنكم غناة = إرفعوا عنا السنين المغبرة
في يديكم للبلاء داء ودواه = وإن تعاصى من سواكم يبتره
زدتوا الراتب وقلنا يا عساه = لكن أصبح مثل عود ومبخرة
وإن صبرنا علّ ينتبه النباه = جاك علمٍ زاد عالجمر إجمرة
والله إنا أهم من ناقة وشاة = جالها ما نحن بأولى بخبره
هذا علمي علم شاعر في فلاه= ماهو لحاله تعلى منبره
إن هو أقدى فإن ربي ذا قداه= وإن هو أخطى فالنشاما تعذره
وأدعي الله إن يفرجها عناة = يالذي ما غيره أرجوا المغفرة
والف أصللي عالذي ربي أصطفاه= عد قطرة غيث مزنه تنثره

المشاركة الأصلية كتبت بواسطة غرمان بن عزيز (المشاركة 371938) الله يجمل حالك يا أبو عابد وعساك تسلم على هذه القصيده الجميله ولا نقول لإ حسبنا الله على من كان السبب وعفاك 0 سجل إعجاب الشديد 0

المشاركة الأصلية كتبت بواسطة الــمــلــتــمــس (المشاركة 372055) صح السانك يا ابو عابد ...................................حقيقه ابيات رائعة جدااا تحياتي ,,,