مرقص دبي اللّي له القلب يرتاح= حتى سلاطيـن الجزيـره تدلّـه

مرقص دبي اللّي له القلب يرتاح=حتى سلاطيـن الجزيـره تدلّـه
لاصار ما في شربة البن مصلاح=غرشه من الويسكي بفنجال دلّـه
وان كان يابن الذيب منته بمزاح=فانا عقدت الحبـل وانتـه تحلّـه
هذي بدايـة معرفتكـم بجـراح=إما شربـت الكـاس والا فخلّـه

ماهوب صح الله لسانـك ياجـراح=يكفـي مـن العلّـه ثلاثيـن علّـه
أنته وحكامك هـل الكـاس لا لاح=والا سلاطيـن الجزيـره لا بـلّـه
حكام نجد اللّي ورا هضبـة رمـاح=ضلالهـم مثـل الجبـال المضلّـه
صغيرهم يلعب بكم لعـب مسبـاح=ويسد فـاه أهـل القلـوب المغلّـه
إن مد كف الطيب ماهـوب شحـاح=والـى تعـزوا دولــةٍ مستقـلـه
مانيب أزكيهم من جـا ومـن راح=يمكن يجي في صفـة القـوم خلّـه
وان كان هرجك لي ولا انته بمزاح=يما حلا بعض الحكـي فـي محلّـه
ما نشرب إلا البن الأشقر إلى فـاح=والا حليب بكار فـي وسـط ملّـه
رجل وطموحي من ورا النجم لا لاح=أكبر من اني أشتهـر فـي المجلـه
يكفينـي مـن المعرفـه والتمـداح=إني إلى ضاقت علـي قلـت : يالله
الوضع ذا مزعجني ولا نيب مرتاح=بـروح واخلـي لـك دبـي كلّـه