أرى كلّ ملبوس(ن) على قامتك لايق = يزيده لياقه قدّك النايف المصبوب
جميع الملابس مابها واسع أو ضايق = على زين عودك كلّها غاية المطلوب
روايع دعاها حسنك الفاتن الفايق = وجسم(ن) تطوّع للرشاقة وطاع الثوب
ألا واهني من عاش في جوّك الرايق = ولذّة سوالف سالم العيب والعذروب
مقاطف عنب خولان ما ذاقها ذايق = على انهارها باسوارها غرسها محجوب
تعدّى الكمال وشاقني صيته الشايق = أتيته بطوع وجرّني للهوى مغصوب
بدى بالأشارة قلت لا عاقك العايق = تراني على خبرك من اسبابكم متعوب
وسجّلت له بيتين واقفى به السايق = وردّيت في المخبا القلم والقلم مقلوب
وجادت عيون(ن) جوّها للبكا تايق = وغسّلت جيبي من نهر دمعي المسكوب
معي قلب مالي على ردّته طايق = ألا يا مخاليق انصحوا قلبي المذهوب