أشره عليك وتحسب اني مجافيك
واغيب عنك وتحسب انه تغلِّي
ماهو جفا يا صاحبي يوم ماجيك
مالي بغيرك يا بعد كل من لِي
لا والذي سواك ما احد يجاريك
غلاك ما خلَّى لغيرك محلِّي
ان غبت بالوجدان شوقي يناجيك
وان جيتني كل المشاعر تهلِّي
طيفك يناديني وروحي تناديك
واللي يدور بخاطري ما حصلي
لا مرضٍي نفسي ولا قادر ارضيك
واليوم من بعض الغلا جيت كلِّي
ماجيتك الاّ قابلٍ كل ما فيك
يا صاحبي ما بالعواطف تسلِّي
شف وين تفكيرك بخلِّك موَدِّيك
وان كان به شي بخاطرك قلِّي
لي صرت تعرف قيمتك عند مغليك
وانك على عرش الخفوق امتعلِّي
أبيك تعلن للعواذل تحديك
إني حبيبك وانت شوقي وخلِّي
لا .. أقفى خيالك حل بالقلب طاريك
مشاعري من صورتك ما تملِّي
وان قلت اباخذ بالهوى معك واعطيك
يا شوق عودنا على طير ياللِّي