ساير الناس
 

يا صاحبي وش فيك عجل وحساس
خلك على ما قيل صدرك شمالي
لا ترقب الزلات مع ساير الناس
وأحذر تصادق واحد ما يبالي
ترى الحياه دروس والكفؤ دراس
ويفيد نفسه يوم يبدأ السؤالي
وانصحك والمقصود لك يرفع الرأس
ياصلك من عندي ثمين وغالي
خذ لك من الرحمه ومن الطيبه لباس
واختر كلام الصدق في كل جالي
وأعلم ترى قلوب البشر تشبه الكأس
والهرج تلقى فيه مر وحالي
والطيب مثل الغرس والشخص غراس
والكل يجني مغرسه في التوالي
والكلمه العليا على مركز وساس
ترقى بصاحبها لدور المعالي
والهابطه تلقى ورى قولها اليأس
كم واحد قد وردته الزوالي
وكم هفوة من صاحب ما لها قياس
شبة حريقه في صدور الرجالي

غرمان بن عزيز

صح لسانك أبو محمد ..
وتستمر نفس المدرسة ونفس الأسلوب الإبداعي والواعي ..
قصيدة ثمينة وجزلة وكل معاني الرقي فيها وافية ..
فيها الوصف والنصح والمثال والتوضيح ..
لاجديد على إبداعك وتناولك للقضايا التي تراها بمنظورك ثم تجسدها
بروعة الكلمة وسلامة وسلاسة الأسلوب الواصل للقارئ بكل تميّز ..
منها للأجمل ولك تقديري ..