[ الملحق ]

الليلة ,, نستكمل حكاية الغراب والحمام
وساحاول اختصارها ,,,, خلوني بس اقلكم ليه سمّى ابنه صقر
يقولون ,, نقلا عنهم ,, انها رغبة منه ليصبح صقر اسم على مسمى
مو مهم الاسم لا يعني الكثير

في تلكـ الليلة الممطرة غادر ( بو صقر ) الديرة
لاكمال دراسته " برّى " وكانت وجهته .. لنـــــــدن !
علما بانه لا يحمل سوى الابتدائية ,, بس كان لها قيمة ذاكـ الوقت !
كل الوزراء حينها بسادسة ,, اهم شيء يعرفون يكتبون ويقرون ويعدّون الفلوس !
ورئيس الطيور هاكـ الحين عنده اولى ثانوي ومكمل بالاملاء والعلوم
المهم .. وصل لندن .. قالوا وش تبي تخصص ؟ قال لغة عربية !!!
قالوا ما عندنا بس فيه معهد قريب خاص بالعرب المعارضين
فيكـ تروح له ,, باللهجة الابنانية .

انبسط واول يوم بالمعهد ..
لقي هاكـ الطيور العربية الطيبة اللي في جباهها نقط سوداء
رحبوا فيه وقالوا لازم تسوي نقطة بـ ( اليبهة ) قال انا اسود ما راح تبان
قالوا حطها بيضاء وفعلا سواها ! لكن بعدما شافهم يسبون طيور العرب
ويحشون بعصافير المسلمين ولا جابوا سيرة اسرائيل
" طلّق ما عاد يقعد فيها "

المشكلة وهو راجع
مر على منطقة اسمها " حشيشستان " فيها طيور مسلمة
اكرموه وزوجوه غرابة زغنطوطة لونها احمر << تعرفون هناكـ طيورهم ملونة
ويوم اكتشفوا انه جبان شوي ,, عالجوه بالخشخاش ! وملعقتين قاز على الريق لمدة شهر
وبعدما اصبح شجاع قالوا توكل على الله وهذي قنبلتين ,, زويدة .
وهو راجع نسي واحدة من القنابل على راس " طلحة "
والثانية طلعت [ فشنق ] فرماها في عش نسر !
ورد لديرته وصار يحدّث ويلقي خُطب !؟!
وتزوج اربع منهم ثنتين كهيل

صاح على الطيور بالنعيق
جاه غراب شايب ,, يعني فيه شوية بياض وقال
( يا ابن الحلال اهجد تراكـ اذيتنا ) بالصياح والعفيق قصده النعيق
كَنّ الرجال ,, يوه قصدي الغراب صحي !! رجع البيت حلق عمره كله
وابعد العلامة الفارقة ولبس ( كويس ) وبدأ يدخن ويتعطر
وياكل توت وكرز وفراولة واحيانا " تبـــــن " طازة
طلق النسوان الاولات وتركـ القراءة على العجز
وقرر ,, الزوااااااااااااج .

لحظة خلوني اشوف من عند الباب
كلمة زواج هذي تسبب صجة ولجة .......
راجع لكم ان شاء الله

صبـــــــــاح الخيـــر والبياض !
ما هنيني النوم قبل اكمل لكم الحكاية

طبعـــــاً كولوكم شاهدتوا المقطع العجيب ...
وعرفتوا ، أنّ الغراب يولد ابيض مثل السكر ’’ مشكلته ( البق ) الخبيث
اللي يغذيه فيتحول الى اسوووووووود !


يذكرني هــذا بِ ( دعاة الليل وزرّاع الشر )
الذين يتلقفون الشباب الطيّب , اصحاب القلوب النقية البيضاء
يغذونهم بافكار نتنة واوهام خبيثة لتتحول نواياهم وقلوبهم الى سواد مرعب !
ما علينــا ,, اهم شيء انا عرفنا وش سبب السواد .


ابو صقــر ,, من زماان وهو يقول ..
سمّوني ابو صقر واحيانا يحب يسمونه [ ابا صُقير ] قبلها كلمة الشيخ !؟!
مع انه لا يزال يحمل وزر شهادة الابتدائية القديمة ,, المهم ,, بعدما ( سلكـ ويهه )
يعني نعّم تغيرت احواله واقواله ولكــــــــن لازال هناكـ فيوزات ضاربة
مو مشكلة ,, عساه بعد الزواج الاخير يهجد !


عاد لعشــه القديم
" مع الخيل يا شقرا " مرّة درباوي ومرّة ( مطوّع ) ومرة عاقل
قام يســال عن ( دادي وبادي ) لقاهم تزوجوا ! دادي ,, تزوجها ابن عمها
وعايشه معه في عش صغير بوادي النمل وظفها تغســل الطيور النافقة
وهو كان موظف وفصل ( مدمن عدس ) وجالس يغرد بتويتر
مرّة يصوصو ومرّة يخوخو !


أمّا ( بادي ) فاخذها عصفور ملون
اذا ( صفرق ) اقصد صفّــر يعني صوصا و بمعنى آخر غرّد
ما ودكم يسكت ! مشكلته الوحيدة ,, نحيف اذا بلع الحبوب تنشب بحلقه
فـ سووا له عملية " بواسير " لكنه طيّب !



اللي يهمنا في الموضوع ..
[ ابو صقــــر وزوجته اللي انجبت له صقر ]
اذا تذكرون ( دادي وبادي ) كان معهم اخت ايام كان ابا صقير ساكن قبالهم
هــذيكـ المسكينة ,, عوراء .. تشوف الدنيا بالمقلوب وهي اكبر خواتها
لكنها ما تزوجت !!!!! اثاريها مغرمة بالغراب " ابو صقر " جارهم
وجلست تنتظره لين ردّه الله ويوم سمعت انه رجع
راحت له وقالت انا قاعدة انتظركـ حبيبي
عشان ما نطوّل .. تزوجها .


سكّنها بالعش القديم
وعلّ والديها وجاب لها الضغط والسكر والملح والبصل
يعني باقي الزيت وتصيــــر ( يدام ) وتستاهل
احلى شي انه خلاها تشوف زين !
واخيراً .. انجبوا صقر .


كبر صقر ومات ابو صقر و( طقّت ام صقر على راسها )
تعدّت الحدود ثم عميت هناكـ ,, وتطلقت دادي ,, وبادي تزوج عليها العصفور
وبعدين سوى حادث ومات وضاعت الشغلة كاملة وكلها من البق !!
صقر بعدما توظف وملّكـ على بومة جذعة اكتشف انه غراب فـ انتحر
ما باقي الا البق والبومة ,, يموتون ان شاء الله
ايه ,, نسيت اقلكم على اسم ام صقر ..
اسمها .. ام صقر !


يُقــال .. لدى الناس نظارات مختلفة
يقرأون بها الحيــاة ,, فـَ يبدو كل شيء حسب نوعية النظارة !
دمتم بخير ,, بيض انقياء

المهندس عشنا جو مع أبو صقر ودادي وبادي
على طاري الصفرقه
أو على قولنا في بني عمرو الصفراج
يقولك أقبل مذيع في الجنادريه
في قسم الجنوب وتلفت في واحد ثمه قال
أقولك ما اسم هذه التحفه ؟؟
رد عليه الريال وقال صفريجة
قال كيف تسوي بها؟؟
رد عليه الريال وقال نصفرجبها
المذيع قال ما استخدامها؟؟
قال الريال خلف فقع قلبه للصفرجه
الحاصل مراد يقولون
المذيع يصفرج في شهار

مبدع ............ حد النخاع

ولكن بو صقر هذا لحاله

بصراحه معجب بما دون هنا
تنقلت بين أم صقر وابوصقر ودادي وبادي والجماعه كلهم وعشت الجو
على ذكر الصفريقه ترا عندنا يقولوا عليها صفريقه
والفاعل في اللحظه يقولوا عنه يصفرق أو المصفرق
أذكر قالوا لي عن واحد أنه صفرق الييييييين دخنت صفريقته .....
وأذكر أيضاً لكم مما نقل لي ان الأولين كانوا يصفرقون كثيييير أبتدعوا ألحان ومقامات والعجيب
أن يكون هناك ملهمين في مجتمع بدوي لا يعرف الفن
سوى انه فن قتالي اتمنى ان لاتكون فكرتي مجرد فكرة أحد المستشرقين عن مجتمع طيب مجتمع الفزعات...
وبمفهوم آخر في العرضه واللعب بالسيف
والقفز لإعتلاء العدو وضربه ضربه قاصمه وجدنا تعابيرها في قصص أبو زيد الهلالي وما واكبها من قصص والاستدلال هنا لقرب الأدب من الوقت والمكان
في كثير من المواضع في قصصهم ولا أعرف إن كانت من أساطير الأولين
أم انها مبتكره وتخبئ الكثير من المتفجرات اللغويه والحماسيه
حيث ذكر ان يضرب احد الفرسان خصمه بالسيف ليخرج يلمع من معاليقه ....!!!....
بكم من قوة حصان ضرب هذا الفارس ......
لابد أنهم حفظوا لنا الطريقه في مكان آخر مثل العرضه ورقصة الفرح والتي لا أجيدها للأسف
الغريب لماذا حفظوا مثل هذه التحركات والتموجات في رقصه للعريس والعروس هي فتوحات إسلاميه...مثلاً ...
أو كان مجرد قصور في فهمي ماعلينا ....
الموووووهيم ....لعدم دعم الإعلام
لهم هذولا اللي يصفرقون أندثرت ألحانهم
ومن باب النكد والتدليل على نكبة عدم الظهور صرنا نلاقيهم في هزل الشباب وتعابيرهم
كأن يقول أحدهم ... فلان يصفرق في شدخه....
للي طلع من المونه بلا حمص
اما البق يا مهندسنا
فمن الوضع المؤسف للبقّ اني لقيته في الضدين بشكل عجيب
لقيته معروف نكره بدون أل بقّ بمعنيين
بقّ بمعنى دع لو القليل
أذكر أثنين من الشباب كانوا يصوروا دعايه للسن توب واحد منهم يشرب
أو يمصق المصاصه بعكس يبصق... والثاني يقول بقّ لي بقّ لي بقّ لي بقّ لي ...

وبمعنى آخر إنفجر وتكون ذلك الهرم الإنفجاري الناري الذي نراه كثيراً في أفلام الأكشن
ونجده في جمله تحذيريه
كأن يخبر أحدهم زميله في طلعة بر ....(بعّد جركل البانزين عن النار لااااااا يبق فيناااااااا)...

تحيتي وتقديري لك ياعظيم

دووووعابه ...انتبه على ملحقك لا يبق بالسياسه ....

مرحبا ابو مانع ..

هههههههههههه
غابّني المذيع مسكين
تقول يصفرج في شهار ,, هههههههههه
هيا قل لابو سيف يزوره وعسى الله يشفيه


اقدّر وجودكـ وروحكـ المرحة غالينا
لا تروح بعيــد ,,
تحيتي لكـ

على راسي ابو سيف ..
فاحت رائحة ديور وخبزة البر والعسل الصافي
بمجرد مروركـ من هنــا

وإنتظر سالفة " القطو الداهية " طال عمركـ ,, قريبا ان شاء الله
بس لا تعلم احد

بوسة غلا على راسكـ
خلكـ حولنا وامنعنا من ابوفهد وابو ريان تكفى

خاطرتي هنا ليس لها عنوان
قد اكون اتجهت بالملحق في مسار اخر فالمعذرة من صاحب الملحق
على ضفاف حلمي البعيد
حملت أوراقي وأقلامي
كي أعلن بدا رحلتي ...معك
رسمت ملامحك صدفة
على شاطئ خيالي بحبر الغيم الخلابِ
هناك اعتليت قصري الذي بنيته لك
اُطل من شرفته في ليلة اكتمال البدر
هناك لاح لي طيفك الذي ملئ عمري بهجة
حيث رأيت أمير خيالي مقبلاً من شعاع القمرِ
وهو يلف الغيوم من خلفه
ويُسقط على قلبي هتاناً فيحييه
كما ءالمطر يحيي الأرض بعد جفافها
هنا امتزجت مشاعري بين الحب والبقاء
وسألتُ روحك الساكنة بي.......
هل لهذا الحلم أن يكون حقيقة!!!
تسارعت نبضات همسي وأنا أتأملك
وعندها أيقنت أن قصري كان من رمال
انهار سريعاً وفقدتك فارسي
في تلك البرهة
عُدت إلى صمتي الذي استقيته من صمت البيداء
وبعمق محيطي غرقت أحلامي
نعم تُهت في حلمي على فجر لقاء الصدفة
ولكن مازلت وستبقى أنت المنتهى
الذي أرنو لـــ أكون ضوء عينيه
فقد توغلت في كينونتي
فــ أنت اذا وطني ومنفاي...
بقلم براءة

اماراتي السعودية

خطييييييييييير بالحيل يا سعودي الامارات
معكـ بان هناكـ تراث جميل يكاد يندثر فهل ننتظر احد يحميه سوانا
الشعوب تحافظ على تراثها ولا تنتظر الاعلام او الحكومة تجي تنعش بقايا اجدادهم
اعرضوا ( شكل الصفريقة ) ومقطع لاحد ابناء المنطقة
واكتبوا عن تاريخها والالحان المؤداة بواسطتها
عبر وسائل الاعلام خير لنا من انتقاد الناس
الكلام لي ولكـ وللجميع



كما اوافقكـ الراي باننا شعب فزعات
واحيانا نجيب العيد ,, ولا انكر وجود جيل (بق بق لي )
وارجع واقول ,, ( التعليـــم واللغة ) والاهم ( التوعية ) يا اعلامنا الكريم
زرع الانتمــاء وحب الوطن والثقة بالنفس وقبول الآخر
والانفتاح على العلوم لا على الموضة فقط ! والاهم العقيدة السمحة والوسطية
ولنخلّي الهياط في الحداب



هههههه
اضحكتني مقولة ,, لا تبق السياسة في الملحق
اخوكـ ,, يكره السياسة والبساسة والحيايا والحنشان
والله يستر لا تلقاني اصفرق في احد العنابر
والا مع المذيع المسكين اللي في شهار


احترم طريقتكـ الجميلة ورمزيتكـ العجيبة
وثق بانني اتمنى ان نعيش جميعاً عصافير جميلة
لا تغرد الا بالخير ولا تقرب من الغربان

تقدير خاص يليق بمقامكـ

اجمـــــل ما بهذا الملحق الصغير
أنّ هنــاكـ خواطر رائعة جدا تُغطي على عيوب خزعبلاتي

شكرا لاهل الابداع حيثما وجدوا

هههههههه
ابو ريان وابو فهد إذا شفتهم اتذكر جيب الهيئة

احيـــاناً ,, تطفو الابتســـامة رغم الألم
لكنها الحياة ,, تمضي كما اراد الله لها أن تكون ,, رغم انوفنا
ومن نعم الله على المؤمن أن جعل امره كله خير
شُكر في السرّاء وصبر في الضرّاء
وكلاهما خير


الحياة منذ الازل وستبقى الى أن يشاء الله
متضادات ومتناقضات ,, خير وشر ,, موت وحياة ,, صحة وسقم
ليل ونهار .............. ونحن البشر نتعايش مع ذلكـ
لا نعرف الشيء حق المعرفة إلا بعد التجربة


عرفت المستشفى كـ [ زائر او مراجع ] فكنت اراه ..
منشــاة طبية يلجــأ لها المرضى لتلقّي العلاج عندما يصيبهم المرض
لم اكن اعرف اسراره العجيبة مطلقا ,, عرفتها بعد أن اتيته [ مُرافقــا ] لاغلى الناس
هذه المرّة ,, دخلته مُعافى الجسد عليل الفؤاد ,, كانت لي به تجربة خاصة
اود أن اضعها هنا في حلقـــات بعنوان
" يوميات مُرافق "




استيقظت على صوتٍ يقول ..
" جدّي تعبان ويبيكـ " , مفاجــأة ,, البارحة صحته تمام
ابوي ,, سلامات ! عسى ما شر ؟ وبصوت خفي اجاب ,, ودني للدكتور !
لم تمض عشر دقائق إلا والجسد النحيل داخل سيارة الاسعاف
ومن ثم الى الطوارئ ومن هنا بدأت ..
فصول الحكاية


الليلة الاولي بالطوارئ
لن آتي على ذكر تفاصيلها , مجرد استقبال ,, تحاليل وفحوصات
انتظار نتائج واستدعاء لاطباء واستشاريين , هناكـ وَجَل وامل , خوف ورجاء
وفي صباح اليوم التالي ,, كان قرار الاطباء ..
( تنويم ) وصرف لبعض الادوية


لا باس ,, حالة طبيعية كسائر الحالات
المريض يحتاج الى فحوصات زيادة واشعة مقطعية وربما اكثر
عليكـ مراجعة مكتب الدخول ,, هكذا قال لي الاستشاري ,, قلت ,, الا يتم هذا عن طريقكم دكتور ؟
اجاب .. لا ! طيب وين مكتب الدخول دوكـ . قال ,, اســأل موظف الاستقبال . اوكـ . شكراً !!
الحقُ يُقال ,, كان موظف الاستقبال لبقا ورائعا لكنه اعتذر لعدم توفر السرير وقال ..
يمكن للمريض الانتظار بالطوارئ الى حين توفر السرير
وهل هذا ياخذ وقت ؟ ردّه كان ,, الله اعلم .

حانت الاقامة ..
فاقام المؤذن لصلاة العشاء ولم يحن نقل المريض الى قسم التنويم
لا تشغلوا بالكم بتتبع حالة المريض فله رب يتولاه ,, فقط تابعوا معي مشاهداتي
خلال فترة اقامتي هناكـ ( مرافقا ) ,, في الطوارئ كانت اولى الليالي
لم اكن اعرف ما يدور داخل تلكـ الاروقة ! حتى عايشتها .
وقبل سرد المشاهدات ,, دعوني اكشف لكم سراً ..


صُدمت والحمد لله انني لم أُجن !
اولاً عندما اكتشفت معنى كلمــة [ مستشفى ] قلت في بداية مقالتي ..
أن الدنيا متناقضات عجيبة ,, انظروا الى حال المستشفى ,, انه اغرب منشــاة واغرب مكان
فيه كل متناقضات الدنيا مجتمعة ,, ابتداء من الوجود الى الوداع , به يولد الشخص وفيه يموت ,, غالبــاً !
في جزء منه افراح بقدوم حياة جديدة وفي جزئه الآخر بكاء ونحيب على فقد حبيب
فيه كباراً وصغارا ,, مرضى واصحاء , احياء واموات , فيه بلاء ودواء
يدخله الكل ويخشاه الجميع ,, من خلال سرد المشاهدات
ستدركون بأنه ,, [ عجيب غريب ]


سابدأ فصل ليلتي الاولى .. والمشــاهدة رقم ( 1 ) ..
باذن الله قريبـــــــــــــا ............... دمتم بصحة وعافيـــة

فاصل منوّع ,, عشان خاطر المدير ..
وبما ان الملحق ( مخصص ) للسهرات السمرات الجميلة
فقد تم تاثيثه بجلسة شعبية ومعاميل وعزبة و( برّادة ماء ) وشكلاطة سمراء وارد العمدة
وقتوه عليها (كرزة) ابو خليل و( ملّة ) لعيون ابو سيف

ايضا وبامر كريم من المدير ..
تم توفير بلوت و ( كيرم ) " بدون حبوب " و(عطيف ) معلقة بالجدار
و( فليت ) عشان البق .. هذا غير العطــر والطيب والعود
والبن الاشقر وحُق الحليب وقدر " سُكّر غير "
و( نيف ) من طلحة الزعيم

بوح ..
لا تحســـبون إنّي من الهـــم خــالي
حتى ولو بــانت عليّ ابتســـــــــامة

لا والله إلا الهـــــمّ ( شمّت ) بحالي
اخفيـــــــه ما ودّي تجيني مــــلامة

وش حــــالة اللي عذّبتْـــه الليــالي
تسهر عيــــونه ما تهنّــا منــــــامه

جالس يراقب حـــالة انسـان غالي
ما في يده غير الدعاء بالســــلامة

الامــر للمعبـــــود ,, بـاول وتـالي
ما كل مخـــلوق(ن) تحقق مـرامه

بعيـــداً عن الموقف ..

مـــدري وش اللي معجب اثنـــين فيني
وانا حلفت انّي في الثــــالث آمــــــوت

اعطيتــــه ايــامي وزهـــــــرة سـنيني
الصــــدر له فريون والحب ريمــــوت

حتى ولو طـــاحت على الـــزين عيني
في بحر حبّه عيشتي ,,عيشة الحوت

صفرقة لعب ..

كنت فيما مضى لاضاق صدري وامتلى هم
اتعشى في المحفــار واسمر في تنــــــومة

جعل من فرّق اصحاب المودة وابتـــــلاهم
يسهر الليل م الفرقــــا وعينه ما تنــــومه

.......

الله يعطيك العافية
مستمتعين .... معك معك

الله يبعد عنك الشر أخوي ويبعدك عن العنابر..... ترا صفرقتها شينه



كنت هنا برفقة أحرفك الرائعه

تابع ....وسنتابع .....بإذن الله .....أخت فاصل ونواصل من الرضاعه ....