حكاوي خاصة !!

مهندسنا الرائع جدا ...... والله إن ودي يهبلك بالعطيف ذا بيده ثنتين وإلا ثلاث أو تعرف إن الله حق

كعادتك دائما تشدنا بإداع الدخول لأي موضوع جديد ....... والآن ننتظر الحكاوي

بعدين أحس من يوم إنك عدت بالريااااض إنك تكتب وأنت بالبشت ((وفي ذا وفي ذاك ووراهو هههههههههههه))

ياومتي من ردٍ قريته (:
انتبه ياالمهندس قسم إن راغ مافي بطني

,
مرحبا بالغالي ,, أبو سيف
اهم شيء راحة البال طال عمركـ
اغلب وقتي بمخيم الثمامة بعد دخول الربيع
والعمل يمشي ببشت او كرفته
ننتظر زيارة مشرّفة لكـ غالينا

امّا الضرب ,, تراهم عجزوا فيني صغير
فما بالكـ الحين ؟؟ اتحداهم



ابوريان ..
بتمنعني والا اثوّر فيهم وامشي
والله انه فرد حمزة ,, ثائر ثائر وكيفها
احترامي

شكلنا ابطينــا بالحكاوي
الليلة نبــدأ باسم الله ,,,,,,,,,,,,,, والله يهبها ع النيّة
وعدتكم بان تكون البداية خفيفة يعني ع السليقة وباللهجة العامية لذا اسميتها حكاوي وليس حكايات !
لن استخدم الفصحى ولن اتقيّـــد بمعايير القصة والرواية
لنبـــــــــدأ إذاً..

يقولون ..
في [زمان الثلج ] كان هناكـ هجرة صغيرة , فيها عشيرة من البدو الرحل
اللي معه عشرين من الغنم واللي معه خمس واللي معه واحدة وبعضهم يسرح مع ( الرعيان )< يعني رعاة الغنم
يسرح معهم ولا معه شعره ,, مدري شيسوي ؟ بس إنّه معهم من صبح الى مغرب وياكل ( زويدته )
وهذا يذكرني بكلب أبو عبدالله , الله يرحمه < قصدي يرحم بو عبدالله مو الكلب
يقلون كان هادئ ورابض في ( طرف اليرين ) وما يفرّق بين الضيف والحرامي
مروا الرعيان مَرّة من عند بيتهم وهو يسرح معهم , رجعوا باخر النهار
ولم يعد < يقولون باقي في ترّته الى اليوم
شكلي شطحت بالحيل !!


اعود ..
الحقيقة انا مدري متى كان زمان الثلج
هو قبل حرب التّركـ وإلا بعدها ؟ لكنه قبل عقود من الزمن ! وعلى طارئ حرب التركـ
كنت اسمع ان اللي ردّوهم رجال بني عمرو وزهران ,,,, اليوم اختلطت عليه الأمور وكُثر الكوذاب !
قرأت بعض كتب مؤرخي الزمن هذا فوجدت كل واحد يحلف انهم ربعه
ما علينـــــــــــــا ,, نرجع للبدو .........


البدو هضولا ,, حوالي عشرين
رجالهم كفو ونسائهم نشميات والظاهر انهم كانوا شوافع < يعني ما فيه غطوة
وعايشين احلى حياة , النايب واللي حواليه كبار واجسامهم ضخمة ويخوفون بس اخلاقهم حلوة
وبقية الربع كلن وحاله , الفقير والغني والميسور < مثل غيرهم من البشر
المشكلة مو هنــــا , المشكلة إن فيه واحد اسمه " سمران "
شاف بنت " مزغّــدة " بالمضارب واعجب بصوتها
شوي شوي حبها فعشقها فهام بها !


سمران هـــــــذا يقولون " اغبس " والبنت جميلة موووت !
حاول بتقرّب منها وبعد مــدة جلس لها عند الغدير وكلّمها < طبعا ما فيه واتسـ ولا سناب ولا بيبي !
كلمها من ورى ضِرب بالمضارب < فيهم شيمة لوّلين مو مثل اليوم , ع المكشوف !
كنّها اعطته وجه شوي , وصدّق المسكين وتعللللللق مرررة !!!
وصار يتبادى من ورى الضرب كل يوم ويحاكيها بخجل
شوي وسحبت عليه , عــاد شوفوا وش بيكون حاله
بعدها ,,,, سوى اللي ما يسوّى عشانها ..
بعدين نكمل . فمان الله

بداية شيّقه مهندسنا..
ليتك كملت ..ذكرتني باعلانات بعض القنوات اللي وقت الذروه والتشويق تقطع وتحط اعلان..
ننتظر القادم بفارغ الصبر..

يا ولد كل تيه قووووووة ..... ما عليه سكتت وارا


يالله عاين المدغبس اكلته الشمس برأس الضرب

اسرع اسرع

خـــذوا هذي الشيلة مع باقة نعناع وبردقوشــ !
استمتعوا بها وخاصة اللي ضايقٍ صدره ,,,,,,,,,,,, تفضــلوا .. الين اعود لكم

https://safeshare.tv/x/ss582243f625e88#v

ابعد الله عن صدري وصدوركم الضيقة

ودكم نستكمل حكاية سمران ؟
والا اعطيكم حكاية العمري اللي سجل في الحرس الوطني ؟
دامكم ما رديتوا باكمل قصة بو سمرة !




سمران هاظا .. من عشيرة " بني حاشم " بالحاء مو الهاء
يقال نسبة الى الحشمة وفي رواية نسبة الى جدهم حاشم , لا يعرف لهم موطن محدد
اكيد لانهم بدو رُحّل لكن ذاع صيتهم وهذا يذكرني بكتاب العلامة الجاسر عن تاريخ قبائل جزيرة العرب
" مجلدات عن تاريخ شوية بدو في الصمان والنعيرية وتركـ حضارة وتراث وعمارة المنطقة الجنوبية "
اللي ازدهرت من قبل البعثة ومهما كتب لن يوفيها حقها , مر عليها كعابر سبيل ,,
يا الله .. ما علينا .. خلّونا في بني حاشم وسمران وحبيبته



تعرفون القرى والهجر زمان فيها مهابيل يدورون بين البيوت
يقولون سمران هاظا بغا ينهبل بعد معشوقته حين تزوجها واحدن من عشيرة ثانية
وصار يدور بالمضارب ويردد " عساني اسبق الزغود , عساني اسبق الزغود "
حتى انه يمر على بعض البنات ويسمعونه يفكرون انه يقصدهم
وهو قلبه وفكره مع ليلاه ............ سمعتوا بالمثل ..
كلن يغني على ليلاه ,, فكروا فيه !



عشان ما اطوّل عليكم ..
بعد سنوات سمع انها رجعت للديرة
فقرر يقابلها ولكن شكله تغيّر , نحل حاله وضعف وعلووووووم
بالصدفة قابلها في الشعيب مع الغنم عرفها وهي ما عرفته وما قال لها منهو ! المصيبة ..
كان معها مولود ,,, سالها من هو أبو هذا الطفل ؟ قالت اختفى ! العجيب في الامر ..
هذا الولد عمره سنتين ويطارد الغنم والعصا على كتفه ويرطن , أولاد زمااااااان
مو مثل مواليدنا اليوم الواحد راسه مثل الحبحبة ولا يراكب كلمتين
واللي تسمي المولود اليوم امّه فتختار أسماء وردية . حتى لو سمّاه
ابوه عبدالرحمن دلّعته " دحومي " دحموا خشمكـ ! كان سمّيته
من اول دحلومي وفكيتينا من المدلع هذا ,,,,,,,,, !
لا عاد تدللون وتدلعون اطفالكم
احنا في حرب !


مالكم بالطويلة
الجميلة عرفته أخيرا وطلع الولد مو لها لاختها وتعافى ســـــمران
وتزوجوا وقضوا شهر العسل في خيمة على مشارف بطحان
بســ مدري هم ماتوا والا باقي .. الله العالم

تحية لكل من مرّ من هنا

اتفقنا ,,,,,,,,,,,,
إن هذه المساحة طعس آخذ راحتي فيه
اطعّســـــ ع كيفي واشب النار لاهوّد الليل واسجّ براحتي








https://safeshare.tv/x/-mHkbg8aJnA#v

هيا سجّ يا بوسيف ......................... !

المشاركة الأصلية كتبت بواسطة المهندســ

اتفقنا ,,,,,,,,,,,,
إن هذه المساحة طعس آخذ راحتي فيه
اطعّســـــ ع كيفي واشب النار لاهوّد الليل واسجّ براحتي


هيا سجّ يا بوسيف ......................... !

جايك جايك ...... الله يسعدك

حيالله أبومحمد موضوع شيق ومثلك ماتنمل سواليفه
وعلى طاري سمران وحب سمران
بعلمك بسالفه صارت في الأندلس
ديرة الأسبان مافيها ضروب ولا فيها مضارب مكان براح الله يرزقني ويرزقك السعه في الصدور وفي الحياة وفي القبور
المهم يقولون انو كان فيه بنت وولد بين الأسبان حبوا بعض وسطروا أنواع الوفاء وكان الولد على قولتك مدغبس تطالع فيه كنك تطالع بدقمة هايلكس اربع وثمانين أمكلفتن وجهه والبنت طلقه شقرا طال عمرك ولايهون القارين واجمل من زرقا اليمامه يقلون سموها الأسبان حمرا اليمامه ويازينهم اذا سمعتهم يقولونها هامورّأءء إلي مامه ...
ودايم في مثل هالحالات الجاحظيه يطلع لك بطل شراني خورافي وبطلنا الشراني كان تاجر من اغنى التجار يقلون شاف هالبنيه المزه بالغلط طاح غطاها في سدة دكانه المهم شافها ومارس طقوس السلطه على أبوها الين تزوجها التاجر وخطفها من حبيبها فانطلق خوينا العاشق بين الحواري وفي العقوم ماتشوف الاغبرته في كل زاويه اما هايم هيم الأبل ولا مربوش وقبعته على راس أصبعه وهو يلفها بيده لف تقل
مروحة بيت ركبها زول غلط فـقامت تدق خوش اذا شغلوها المهم بعد طقوس العشق وحياة الموت والدنيا الغبرا وتغير الأقواس القزحيه الى أقواس سلحيه وعلوم شينه
رجع للعاشق عقله وقرر ينتقم ويسترجع محبوبته المهم رحل في الدنيا وتاجر
وصار من اللي يمشي ومعه دوريات عبيد في الأسواق يمشون وراه والله ويروح لديرة التاجر اللي خطف معشوقته ويتحايل على حبيبته الين لاقى حبيبته في غياب زوجها ورتبوا خطه على قولة المصريين ما تخرش الميه لو تخرخرت السقوف كلها
والله وفيه يوم حبيبته تروح عند زوجها بعد صلاة الفجر وتجهز ملابسه وهو يلبس وقبل مايطلع قالت له ماودك تركت العمه السودا ذا بخشعتك ولبست العمه الخضرا
ينزلها المنحوس من على راسه ويطالع فيها قال هذي العمه الخضرا الله يهداك بس ويطلع عاد بالسوق أستلمه حبيبها كان يدفع قروش لناس ويرسلهم على زوجها يمترحون بدكانه شوي واذا بغوا يطلعون قالوا للتاجر ماودك أنك لبست عمه خضرا تليق على لبسك المشجر ينزلها ويطالع بها الا ويشوفها سودا المهم والعاشق ماعنده شغله الا خوينا التاجر البطل الشراني وعلى هالحال الين يقلون تفل العافيه وانقلب السحر على الساحر وراح فطيس صاحب الممارسات العدوانيه على المتحابين وآخرته فلس وطلق زوجته
ورجعت لأهلها وجا اللي عشقها أول وتزوجها وحاشوا برغد الحيش وخلفوا صبيه وصبايا واذروا بعد ما بغا ينقطع نسل الماخوذ



الله يسعدك سامح أخوك وخربشاته واذا لقيت وقت أعتبرني متابعك
وإن كان سافرت عاد سامحونا

هيّااااااا ........أقعدوا في العافيه

رهييب يا الصياد
شكللي باطلع ع السطح واتابعكـ ,,
أسلوب ممتع وتلميحات خطيرة ............!
حياكـ سيدي ! استمر ونجن متابعين

وفقكـ الله

حقيقة ,, تريد وانا اريد والله يفعل ما يريد !
كنت ناوي اروي حكاية خاصة ولكني تذكّرت سالفة "اليعسوب الأصفر " فغيرت رايي
وبصراحة انا لا اميل كثيراً الى هذا اللون ! مدري ليه ؟ المُهـم .. خلونا في البداية نستعرض جزء بسيط
من حياة النحل ,,,,, حسب بعض التصنيفات هناكـ ثلاثة أنواع من النحل .. " لست متأكد كثيرا من هذه المعلومة !
- افريقي ,, حجمه صغير ومنتج جيد للعسل , اوربي حجمه كبير وهادئ الطباع بدرجة كبيرة
والآسيوي( الشرقي ) ومنه النحل السعودي وهو عنيف جدا وشرس ويعض العرب
قصدي يلسع !يا سااااتر ,, حتى نحلنا عنيف وش هالحظ الاقشر
بس الحمد لله الحمد لله الحمد لله ان وضعنا الاجتماعي لا يشبه
حياة النحل والا كانت علوووووووووووم !


طبعا ,, تعرفون ان مملكة النحل تتكون من ثلاث فئات ..
الملكة وشغلها تنتج بيض وبس .. يا عيني عليها ,,,,,,,,, ملكة !
الشغالات وكل الشغل عليهم ,, كل شيء دون استثناء , سبحانكـ يا رب !
بس تعالوا شوفوا مهمة الذكور ,, وظيفتهم ,, تلقيح الملكة
لا .. والمصيبة كل ذكر يلقح الملكة يودع الملاعب !
يعني يموت بعد التلقيح مباشرة يعني مرّة وخلص !
كيف لو البشر كذا ! حرام ما يكون باقي واحد
الحمد لله على نعمة الخلق والإسلام


طيب خلونا نشوف قصة خوينا هذا
" اليعسوب الأصفر " اصله جاء من اوربا بعد ان هجمت " الدبابير " على خليتهم
وخلتها اشبه بِـ " حلب " نســـأل الله ان يفرجها على إخواننا في حلب وينصرهم على اعدائهم واعداء الإسلام
ما ودي نقلبها غم ,, نرجع لليعسوب ,, جاء من اسبانيا مهاجر ولقي خلية نحل في القوباء يسكنها مجموعة من النحل ؛
دخل معهم والحقيقة انهم في البداية ,, نشبوا له بس جلس يجاملهم ويقنعهم بأسلوبه
ان الحياة زينة والناس لبعضها لين صار واحدن منهم .... مير الكارثة ....
ان هذا اليعسوب يفكّر انه حلو ما يشوف الا جناحينه شفافة ومرنة
ولا يشوف خشته لان ما فيه مرايا في الخلية !! صح ؟؟؟
على هذا الأساس بدأ يتقرّب من الملكة



شوي شوي ....
لاحظت الملكة هذا الاهتمام ولكنها متكبرة حيل ,, ما تلّام , لابسة احمر وعيونها زرق
وحلوة حلوة ,, رشيقة وطويلة وعندها غمازتين وحبة خال وتسرّح شعرها على جنب !
بو يعسب ,, طاح في الغرام " بروحي عنه " ,, صار ما يرقــــد الليل من مغرب الى طلعة النور
وهو على طرف الخلية يغني ويتنهت << كيف لي محلاه اذا قال " آآهـ " ..... يا ويلها قلبها قاسي
الحاصل ,, انه معزّم يغامر وما فكّـر ولو " لقي بنت الحرم بعدها " " الدولة غنيّة اقصد الحب اعمى
يعني ولو طفســ ذاكـ الليل .عادي ,, .لسان حاله يقول.. النار ولا العار ! المهم
ليلة الأربعاء يصبح السبت قرر المغامرة وحبكـ الخِطَة ,,
وقريبا - ان شاء الله - اعلمكم وش صار ذاكـ الليل !

الى اللقاء

يا خســـارة ,,
كان ودّي انّي حكيت سالفة ليلة الأربعاء
لكن قابلني بالصدفة واحد طالع من بيشة في قافلة ,,,, ولو ان ما في بيشة تمر ! بس مو غريبة ,,
تذكرون شركة بيشة للتمور زمان , وصل سعر السهم 1000 ريال وذاك الوقت ما في بيشة نخلة مثمرة
جفاف وقحط ! عجائب ! هذي هي الأسهم وصدق الله العظيم ..
(( الَّذِينَ يَأْكُلُونَ الرِّبَا لاَ يَقُومُونَ إِلاَّ كَمَا يَقُومُ الَّذِي يَتَخَبَّطُهُ الشَّيْطَانُ مِنَ الْمَسِّ ذَلِكَ بِأَنَّهُمْ قَالُواْ
إِنَّمَا الْبَيْعُ مِثْلُ الرِّبَا وَأَحَلَّ اللّهُ الْبَيْعَ وَحَرَّمَ الرِّبَا فَمَن جَاءهُ مَوْعِظَةٌ مِّن رَّبِّهِ فَانتَهَىَ فَلَهُ مَا سَلَفَ
وَأَمْرُهُ إِلَى اللّهِ وَمَنْ عَادَ فَأُوْلَـئِكَ أَصْحَابُ النَّارِ هُمْ فِيهَا خَالِدُونَ ))

اللي عنده اسهم , يتوب وله ما سلف !
فرصة وربي
ما علينا .


اعود للرجال اللي مع القافلة ..
يقول مريت من وادٍ غير ذي زرع بين بيشة والقوباء وشفت الخلية
حقت يعسوب , يقول ما فيها شيء وبعد ما حلّفته ,, قال فيها شمع وشويييية عسل
فيها كم ذكر وبعض الشغالات و" ادبورين " كبار في الطلحة المجاورة
مدري وش قصده بادبورين ؟! قلت .. طيب والملكة ؟ قال طقّت
ويعسوب ؟ قال مدري ! وايش ذلحين ؟ قال ..
طق على راسكـ !


حينها تذكرت قصة ,,
يقلون فيه واحد حضرمي بنا جامع
ويوم شاف زحمة المصلين والعالم وتعبّت المواقف والناس من كل حدب وصوب
قلبه مطعم ............ ؟!؟!

لهذا باقلب الحكاوي
[ خواطر شعرية ] واقفل الشبّاكـ اللي يطل على الحديقة
ولو احتلقت بالدخان عادي


حفظ الله كل من مرّ من هنا
ورد وتحايا

فيه ناس أبشرك مستثمرين نكتة الحضرمي أفضل إستثمار....

الا قول لي يبومحمد حكاوي خاصه فيك ولا وش وضعها بالضبط
ولا خاصه بوضع معين وحاله معينه وحرفيه معينه ....
من اول أحسبها خاصه بالكاتب بس صرت أشك بوضعك ....



ومتابعين طال عمرك....