قصيدة حزينة لما اصاب الأخ فهد ورد الرادار

بدع فهد العمري والقصيدة تشرح السبب

يالله أني طلبتك ياعزيز الجلالي=ياسميع النمل في همسه وفي دبيبه
أنت ياحي ياقيوم ياخير والي=لك على الكون سلطةحكم قوة وهيبه
أتضرع إليك أرجيك إلح بسؤالي=وأعترف لك بذنب هم نفس منيبه
أشتكي قل جهدي وأشتكي قل مالي=وأنت يالله وحدك خير من نلتجيبه
ضاقت النفس يوم أن الدهر ماصفالي=يوم ضاع القريب اللي يساعد قريبه
خوة العز تبقى حلم صعب المنالي=ياحسافه على الخوه ويا شق جيبه
من بناء بيت عزه فوق جرف هيالي=والله أن يقعد سنين يجمع خشيبه
مايعرف العلوم إلا فطين مثالي=لو ينب المنبي من يلبي نبيبه
كلن يقول أنا عنتر بعيد اعتقالي=وألى جات الحقيقه مابدا من مغيبه
يحترونه يجي بمحددات السلالي=لكن أبطى عليهم مغزي في شعيبه
مادروا أنه متيهم وهو ما يبالي=خطوته قاصره وأيد الجمايل عطيبه
عصرنا مايجارينا مع ذا التوالي=كل شرهه جنوها جمرها نكتويبه
هم ضياع وهم أهل الخنا وإحتيالي=بانيين مقاصدهم على كل خيبه
هذا بعض من اللي في ضميري طرالي=وألا ياكم كتبنا والورق في حقيبه
ماعليه من الحيه ومكر الثعالي=بيني وبينها فالوقت حرب صليبه
لكن أشره على اللي يقطعون الوصالي=من لهم عندنا وعد وعهود قطيبه
وينهم مالخصوم اللي يبون إغتيالي=ماتوقف بصفي والمواقف صعيبه
بعضهم مالقيته يوم شد الحبالي=والمحامي خذلنا في ظروف غريبه
والقرييب يلقط من كلام السفالي=لكن أقول ماأجازيه والله حسيبه
وأنا والله ماخذ من كلام الملالي=أنشز بيوت شعري من حصون مهيبه
أتدارى زماني وأغتني من حلالي=والكلام الحقيقي أبيع به وأشتريبه
والتجارب قناعه خل عنك الجدالي=الربا صك باب الرزق وأكبر مصيبه
والحكم قالها بوزيد وأبني هلالي=في علوم الرجال وفالقصائد الإديبه
حن قوم نخاطر ماحسبنا القتالي=روسنا فالسرايا جامعتنا كتيبه
كل حرب رزمها بينه فالدحالي=غمرنا فالمعارك مارجع بالغليبه
الله ياكم رقينا فوق روس الجبالي=من نوايف تهامه لانوايف هضيبه
ولاتذكرت في رجم طويل لحالي=أتذكر حبيب ما يفارق حبيبه
قانص الصيد متغشي عيونه خيالي=يرمي الصيد لاكن مايصيب الظريبه
الرصاص يتقادح مثل برق يلالي=لا تقافت نصوبه في ديار جديبه
شاقني نبت غيث لاسقاه العلالي=من جبال النشام ألى فروع الشطيبه
ياهجوسي على الديره ويابري حالي=كم لي اسنين وشهور حدتني المغيبه
لا خوي في الغربه أورفيق موالي=ولاصديق يواسيني ويرسل نديبه
ولا حياة سعيده إلابصحة عيالي=الليالي حدتنا والمواقف كريبه
يوم شفت إن حياتي مقفيه من قبالي=ودي أزور مكه وأتعبد بطيبه
فأنا في ذا لزمن والله مانيب سالي=ومحمد طواه الضيم وأعجز طبيبه
يامحمد تحمل بوك حمل الثقالي=زاد حزنه وهمه في ظروف عصيبه
وأنت يابوك حرقة كبد وألاأنت غالي=ليتني فدوة لك من حياة تعيبه
من مرضك يتصلا القلب من لفح صالي=لافي القلب صبر وأعتلا الراس شيبه
أدعي الله يجيرك من صدوف الليالي=ومن غبون الرجال الي تجي بالغصيبه
وأرجي الله مايخيب رجائ والآمالي=فإنها دعوة المضطر والله مجيبه
كان ربي كتب لك عمر خلك شمالي=أعبدالله ونفسك في عطاءالله رغيبه
ولاتفكر بجمع المال فالمال بالي=كل واحد في الدنيا بيأخذ نصيبه
المقدر يجيك ولايجي بعتجالي=لاتحاول تعجل رزق ربي يجيبه
وأنتبه من رفيق السوءراعي الظلالي=ولاتخاوي هل النمات وأصحاب غيبه
لني أشفق عليك أشفق من أم الثكالي=غير طبق نصائح بوك وأدفع ضريبه
خذصفاتي فأنا اللي وافي في خصالي=نسل حر نسبهم من رجال عريبه
وأنت خالك موزى من كريم السبالي=جعل قبره رياض فالجنان المثيبه
عمي اللي فقدته فالسنين الخوالي=ياغبوني غبون اللي توفى صحيبه
بعد فرقاك مالي فالسعاده مجالي=صافي الدمع يسكب من عيوني سريبه
ليتك تشوف ويش اللي جرى فالمحالي=عادت الدار بعدك نورها مايضئ به
تشتت الشمل وأنهدت صروح المعالي=والمجاهيم ذي ترعى غدت في زريبه
والعفيفات بعدك ماعرفن الدلالي=الله أكبر على الدنيا الدنيه عجيبه
صوت أذانك كما صوت المؤذن بلالي=مسجدك من فراقك له ونين ونحيبه
رحمت الله عليك أقولها في مقالي=والله أن كل نفس تعرفك مستصيبه
وأنت ياموت تأخد عز عم وخوالي=أشهدأني من أسواتك دموعي سكيبه
كم رجل خذيته من قروم الرجالي=حل بعده ظلام الليل وأرخى هديبه
وأنت ياموت حق الله علم برتحالي=يمكن أنك ترصد لي بخط القليبه
أطلب الله حسن الخاتمه والكمالي=مثل موتة معاذ ومثل موتة قتيبه
فالنجاه التمكن في خطوط طوالي=ماعرفها يكون أهل العقول اللبيبه
ومايشل الحمول إلاظهور الجمالي=يالله أنك توفقنا العمل نعتنيبه
وأهدنا للصراط ونجنا مالزوالي=وأكفنا ياإلهي مالفتن والنشيبه
وفالنهايه ختمناها قراح زلالي=نابت المسك في جاله وفواح طيبة

رد الشاعر مبارك العمري (الرادار)


بسم ربي بديت وراسي الشهم عالي=ومن يحط الهدف قدام عينة يصيبة
بعد ماوصلني مندوب قول وفعالي =مقصده واضح ما فية شك وريبة
لفتة همتة لف الرياح الخيالي=وافتطن له بقلب فية عزه وطيبة
مير لو زاحت ارياح الشمال الرمالي=بينت لي كتابات الحجار الرسيبة
وانت ياللي تحدث بالمعاني الجلالي=ما زهى المنبر الا من تمكن خطيبة
مالك الا السعد لاسج للقاف بالي=والبعيدة علية بالحقيقة قريبة
والعلوم اتلون بين مر وحالي=والمصايب ليا حاطت بشخص تعيبة
وانت مالك على سحم الحناجر ولا لي=خل من دار شر في الخفا يهتنيبة
وانتبه لاتمادى في الخطا والزلالي=واحصد الزرع من منتوج الأرض الخصيبة
لاتسمع لمن هرجة بقيل وقالي=والكفو لا تحايد عنه والا تسيبة
لو يهبهب شماغ ملزمه بالعقالي=ماله الا يلف ونلزمه بالعصيبة
وانت تدري وتعرف ويش مقصد مثالي=الوفي واجب انه يحتمي في نسيبة
خل من حدته بقعا مع الناس تالي=يعتذر من صلية ويتقبل طليبة
راعي العرف يطمح في العلوم الجزالي=مايباري الخطية تو عين رقيبة
ولايبيع الثمينة بالهلل والريالي=يشتري الطيبة من شان يلقا كسيبة
وان درج عن سموم الشمس ليت الظلالي=مادرج عن لهيب ينتبه من شبيبة
وإن توالت سهوم الحقد جالك وجالي=كلمة الحق تضرب في صميم التريبة
والنصيحة نعلقها بروس المدالي=يوم نسمع عويل الذيب والا قنيبة
ندري انه بروس النايفات الطلالي=ما يخاشره فيها غير جروه وذيبة
وإن نوى الذيب غدر امه بسبة غزالي=والله ما شاقه الا حجر منبع حليبة
اسمع الصاحب اللي للقصايد هبالي=يوم يضرب على اوتار العلوم الرهيبة
لايحدك زمانك وتصيد هزالي=من يطاوع زمانه يصغره ويغديبة
والحقايق تبيّن مثل نور الهلالي=والله يعلم بما في الصدر جهره وغيبة
والسمينة يفرقها الوفي ع النحالي=والعيون الرهيبة تنتحي لرعيبة
اما من ناحية يوم طال عنك اتصالي=والله معاد روحي للسوالف طريبة
ما انت جاهل بما جاني وماقد جرالي=يوم ورتني الدنيا دروب وتيبة
لين خلتني اعلن كبوتي واعتزالي=واتذكر حياتي بالديار العشيبة
لا رصيد يطمعني ولا حاسب آلي=ولايدين قصيرة ولا وجيه شحيبة
في بيوت تلزم فليها بالخلالي=وتجود مساطعها بحبل ونسيبة
ثم تعلقبها عكاك السمن والمخالي=والحوافظ بذاك الوقت كنف وعيبة
والرحا ماتدور الا بحب الثمالي=والضعن مايشد الا بظهر الركيبة
والعرب حينها كانوا زحول وعتالي=والجمايل تباريهم مثيل الربيبة
بعدهم فارقت ضو الكريم الدلالي =عاد هيل اليمن والبن يشبه زبيبة
انشد اللي بعلم الطيب والعرف دالي =لاتغرك تناتيم اللسان الرطيبة
واضح ان الزمن مقفي وفية اختلالي=عقب ماشفت وادي ترج يصدر شريبة
والخواطر ظهر من فوق ماها الحثالي=والكلام المنمك يافهد ويش نبيبة
انطح الضلع بزعومك وطو التلالي=وانتبه جمر عود الشر تصلا لهيبة
وانتبه لاتلقف من اليمين الشمالي =وشد والعب على الحبلين تلقا لعيبة
ولاتغطرف على حرب القرايب لهالي=فإن زلة لسان الشخص مثل الحريبة
خل قيض الزمن يقرش بطون السحالي=ويش حدك على فعل العلوم المتيبة
وصك باب الخطا بمعجمات القفالي=واكتفه بالزرافل واحكمه بالضبيبة
خل من مات تقرا له رسايل مفالي=والله مازام عن قبره يكون النصيبة
في غموض الزمن مغزا وفية انتشالي=باينٍ يوم قيعان المراهي صخيبة
لاتغرك مماريغ الجمال المطالي=وانت داري انها ما احتكت الا جريبة
ولا يجي في عروقك من المواقف زمالي=والزمن ما بعد كشر في الوجه نيبة
ولاتعاين لروس حوطتها القذالي=حد عصبتك باقي في عطفها عذيبة
وإن توحدت في ليل كثير الهوالي=لاتصنت لهول فية تسمع سحيبة
واحسب الوقت لو في ايديك ساعة زوالي=عقرب الثانية ما تجهله من نطيبة
وإن غزتك الحقيقة تو حكم عدالي=قاسي العلم قو الصبر غصب يذيبة
بعد هذا بيوتي بالمثايل حوالي=مانويت اظهره من مبطنات الحديبة
ساقها الهاجس اللي ضمها مايوالي=لافهمها لبيب القلب رد الذهيبة
اسمعوا ياعيال اليوم ياهملالي=ياهل البيتزا والشورما والكبيبة
شاعر لا ارتكا للقاف كنه يلالي=جعل من علمة فتل القوافي يثيبة
والختام الزمن بين كثير التحالي=في جلود من اسباب المشاكل حصيبة

فهد العمري

ومبارك العمري

صح الله لسان الاثنين

قصااااااائد قــمــــــــــــــــه

انا لاحظت الرادار في كم قصيدة ومستحيل يوقفه شاعر مهما كان الأمر ومتمكن واتمنى ان لا يحرمنا جديدة وله مني اطيب التحايا

صح لسانك يالرادار

وبيض الله وجهك ...

شاعر مبدع ومتألق ...


وكل قصائدك تطربني ...

اسعدتني بها الله يسعدك ...

إحترامي

صح لسانكـ
قصائد رائعهـ
الف شكر

الله يعطيكم العافية ويسهل امورنا وأموركم ويفرج هم كل مهموم