قصيدة خلف الجنادرية 20

للوطـن حنـا فـدا و الملـك حنـا فــداه

خلف بن هذال العتيبي

السلام ولا سهى القلب عن ذكر الالـه =ربنـا اللـي نـزّل اقـرا و علّـم بالقلـم
جل شانه في جلاله .. تبارك في عـلاه= منفـرد بالغيـب يعلـم ولا غيـره علـم
نسأله عفوه و لطفه .. صمد ما احدٍ سواه =صوّر الانسان وانشأ وجوده مـن عـدم
نطلبه الجنة و نرجيه من النار النجاة = في نهارٍ فيـه خصـمٍ اذا خاصـم خصـم
فوق عرشه مطّلع يستجيب لمن دعاه=ناصر المظلوم .. منـزل عقوبـة مـن ظلـم
القمر خمسة عشر مستهـلٍ فـي سماه=فـي جمالـه فـي كمالـه تهلـل و ابتسـم
و الوطن بايدي امينة تربّت في حماه=ذخر فتّـاك الركايـب اليـا ازبـد و التطـم
البطل يذكر و يشكر على سعيٍ سعاه=بالعزيمة جاب مـا غـاب يـوم انـه عـزم
اعلن الوحدة بيومٍ ملى الدنيـا صداه=رُسمـت الخطّـة علـى عيـن رسّـامٍ رسـم
ثبّت المبنى على ساس يرحم من بناه=صرح شامخ مـا تزعـزع كيـان ولا انقسـم
المؤسس من نشد عنه تكفيه الرواة=و اسأل التاريخ و الوسـم و أسـم اللـي وسـم
استرحنا تحت امانه و نمنا في ذراه=تـو ذقنـا العافيـة .. تـو مـا ارتـد النسـم
البشير يجيب بشرى و يفرح من نصاه=ابشـروا بالخيـر و الشـر ولّـى و انهـزم
الوطن عهدة فهد ما مشى الوالد .. مشاه=حارسٍ مامـون دون المحـارم و الحـرم
له علينـا مبايعـة و الـولاء والله ولاه=مـن وفـى بالعهـد للفهـد والله مـا نـدم
يـوم جندنـا المبـدا رفيـعٍ مستواه=نخـدم الاسـلام و لخـادم الكعـبـة خــدم
مرخص الغالي لشعبه وهذا من وفاه=رافع المبنـى للاوطـان .. يبنـي مـا هـدم
مكرمٍ يعطي و نعطي العطايا من عطاه=كاسب المعروف رجـل المـروة و الكـرم
الكريم ليا حلب في قدح فاضي . ملاه=راعي الكرما فهـد و الفهـد حـر و شهـم
دين ما مثله ترعرع و حلّـق فـي صباه=يافعـيٍ ينـزع الحـق وان غـار انتقـم
طلعتـه طلـع السعـد نـادرٍ يحمـد ثناه=بالشجاعـة و البراعـة تحلّـى و اتسـم
داهية وله الدواهي تخضّع من دهاه=ما تـردد فـي قـراره , ليـا قـرّر .. حسـم
الوطن ينخى فهد وا هني اللي نخاه=نخوتـه فـي ساعـة الضيـق نخـوة معتصـم
الوطن يندب فهد في رجا الله ثـم رجاه=ينقـذه مـن غـدر قـوم و عميـلٍ متهـم
للوطن حنا فدا و الملـك حنـا فداه=الزعيـم اللـي عـن الديـن فسّـر و احتـزم
يا ملك نِعم الملك .. يا ملك نخوة و جاه=بالممالك يـا ملـك كنـك الطـودة الاشـم
عادتك يا ثالم السيف من روس الطغاة=يا عسـاه الكسـر سيـفٍ يعلـق مـا انثلـم
خل شامان يعلج لا ترده في خباه=ليـن يـروى مـن حجامـة سقيـم مـا احتجـم
عند باب الحكم سيّاف و الحكم اصطفاه=من تهاون و استمع شور غيـره مـا حكـم
المواضي تنشر العـدل و تعمـر الحياة=يستتـب الامـن بالسيـف و ذراعٍ عسـم
حفلنا الليلة يليـق بمكانـة مـن رعاه=نايـب القايـد ولـي العهـد راعـي الشيـم
مرحبا باللي حضر و اسعد ( الباري ) مساه=ركن نجد و ركن من يزهمه وقت الزهم
شيخنـا عـدل المناكـب وقـاه الله وقاه=سلمـه ربـي لخدمـة بـلاده و العـلـم
في سبيل العـز بالعـز معقـودٍ لواه=مجـذم الهيجـا ليـا عـودوا خلـف الزخـم
طيب الذمة كسـاه التواضـع و اكتساه=مـا تباهـى و افتخـر بالتبجّـح و الفخـم
ان زعل نزعل و نزعل و نرضى من رضاه=وان تألمنـا تألـم و شاركنـا الالـم
له عهود وله جنود تقـدّر لـه غلاه=فـي لزومـه يتبـع الصـف صـفٍ منتظـم
سيدي يزهى بك الشعر ما مثلك زهاه=شاعرٍ ينظم من الشعـر و اسمـع مـا نظـم
مخلصٍ يبعث شعوره يا عله يا عساه=يشبـع المعنـى و يحظـى برغبـة محتـرم
سرت بالتوفيق و يسير من سارت خطاه=في طريقك يمسح الدرب عن شوك السلـم
ابـو خالـد كـم يتيـمٍ تبنـاه و رباه=متّعـه عـن والدينـه و سلّـي و انسـجـم
يرحم المحروم سلطان و يخفـف عناه=سخـرة الرحمـن والله يرحـم مـن رحـم
طال عمره ما يسويه من خيـرٍ كفاه=عـن صواديـف الليالـي و دسعـات الرمـم
ما يخطط للعروبة يثيـر الانتباه=يـا رجـال ان الفـرص يـوم تسنـح .. تغتنـم
انظروا بالوضع و استمعنوا ويش السواه=لا يضيع الراي و نضيع و يطيـح الهـرم
يجري الماء من تحتنا نراه ولا نراه=العرب تسبح علـى امـواج بحـرٍ مـا هضـم
العليل ان طوّلت علته يصعب دواه=يسهر الممروض و يمـوت مـن طـول السقـم
و الورم يكبر و ظني طبيبه ما احتواه=كـل مـا ينـزع ورم بالجسـد يطلـع ورم
الوطن ماهو بمرتع خراب لمن بغاه=نحتميه وقد حميناه مـن ( روم ) و ( عجـم )
نتفانى له و نملى المقابر في ثـراه=و الذوايـد مـن نصيـب الحنـادي و الرخـم
من توهق بمغزانـا لعـن غـزوٍ غزاه=ارضنـا مـا للعـدو فوقهـا ماطـا قـدم
الوطن منّا و فينـا ولا نلحـق جزاه=الامـان و لقمـة العيـش مـن حمـر النِعـم
امة التوحيد حنا وحنا اهل الصلاه=و الزكـاة و رمـز الاسـلام مـن بيـن الامـم
لو طغى راعي الهوى ما مشينا في هواه=ما نطيع افكـار ملحـد ولا نعبـد صنـم
من يقابلنا بحجّه نحجّـه و نعصاه=بالدليـل نخاطـب النـاس ( لا ) ولاّ ( نعـم )
مـا طرقنـا بالاذانـي لوشوشـة الوشاة=قافليـن البـاب عـن كـل كـذابٍ هيـم
قامت ارباب السوابق تستّـر بالعباه=عـن عبـاة الديـن يخسـون هافيـن الذمـم
كيف رب البيت ما يدري الا عن عشاه=هو تعشا ! هو تغـدا ! علـى رز و لحـم
و الخطر و الموت بين الغرف يطحن رحاه=ما وعى في مرقده لو يشرّك لـه لغـم
الابو مسؤول عن ما يدبّـر مـن وراه=سـارحٍ فـي غفلتـه لا همـوم ولا همـم
لو يضيّع شاه كدّر على اهله و إقصراه=و الشباب يضيع و يقول ما ضاعـت غنـم
الولد يطلع ولا قيـل وش اسـم زملاه=اجتمـاع الـذل و العـار و التفكيـر اهـم
صنّع التخريب شين الطبوع ومن خزاه=انطلق به و انتحر بعد ما ظـن و زعـم ..
انه اقرب للنبي وانه اقرب من عصاه=من هبالـه فـي خيـال الشهيـد ليـا هجـم
الشهيد اللي عن الدار ياقف ويحماه=من يمينـه فـي صـدور العـدا يرسـل سهـم
كان ما للجاه لحدٍ يـرده عـن خطاه=مـا بقـى عاقـل ولا صـار للدنيـا طعـم
غايب الاحساس يذهب حياته في شقاه=الشقي ما يـدرك الحلـم خيبـة مـن حلـم
مس سرج ابليس و اطلق عنانه و امتطاه=بالخراب الخايـب امـا سـرى ولا جهـم
منحرف .. مفسد . مراهق .. موجّه من اعداه=غرّروا به و اغدروا به عساهم للوهم
امسحوا مخّه و ساقوه عكس الاتجاه=و اصبح المخدوع و امسى عمى و ابكم و اصم
العمى عمى البصيرة هذا والله عماه=العمـى ماهـو كفيـف البصـر ديـن و قسـم
بس في فعل الردى من امره ومن نهاه=الغبـا واهـل الغبـي لـو يفهّـم مـا فهـم
رايحٍ للهاويـة سرمـدة ليـلٍ سراه=يسـري المنجـوم و يكـذّب انـه مـا انّجـم
الهـدف مشبـوه و المشتبـه بيّـن رداه=للخساسـة طافـي النـار سلّـم و استلـم
خارج الملّة مرق يوم ربي مـا هداه=بالمصايـب و الكـوارث نسـف كـل القيـم
تاجب اللعنة على محدثٍ جانـا بأذاه=نشهـد انـه خـان بامانتـه و اجـرم و اثـم
ومن أواه ومن رضي فعلته تبّت يداه=وجهه اسـود كحـت و اسـود مـن الفحـم
ما درى كبش الفـدا لـو يقـادي للذكـاه=و الكـلام بخاتـم الانبيـا تـم و ختـم

درع الجزيرة
الله يعطيـــــــــــك الف عافيــه على النقل الطيب
وصح الله لساان الشاعـر خلف بن هــذال العتيبي
تقبل أطيب تحيـــــــــــــــه ودمت في خـــيـــــــر

الله يعطيك العافيه

للوطـن حنـا فـدا و الملـك حـنـا فــداه
الزعيم اللـي عـن الديـن فسّـر و احتـزم
يا ملك نِعم الملك .. يـا ملـك نخـوة و جـاه
بالممالـك يـا ملـك كنـك الطـودة الاشــم
عادتك يا ثالـم السيـف مـن روس الطغـاة
يا عسـاه الكسـر سيـفٍ يعلـق مـا انثلـم
خـل شامـان يعلـج لا تـرده فـي خـبـاه
لين يروى مـن حجامـة سقيـم مـا احتجـم

الله يعطيك العافيه على هذا النقل