حمَام يا اللي فوق الأغصان غنَّى

حمَام يا اللي فوق الأغصان غنَّى -- غَرِّد و أنا بعدك بغرِّد و أغنّي

جّر اللحن و ( اشْلَع ) على ما تمنّى -- مالي و لا لك غير كِثر التمنّي

عمرٍ مضى و أنا أسمع اللي يونّا -- و أهِلِّ دمعي لاسمعته و أونِّي

ما هو وَلَعْ باللي تِهِزّ و تثنّى -- و لا هو طَرب ؛ من زين صوت المغنّي !

ما زاد من حُبِّ العذارى حزنَّا -- مهما على درب المحبَّة دَعَنِّي

ما همنّي بعيونهن لو غزنّا -- و ما همني سهم النظر لو طَعَنِّي

بس الخوي اللي حسبناه مِنَّا -- و اللي على فرقاه كِنَّا نِحِنّي

اللي من أول لا بغانا زبَنّا -- لامِنّ مِيلات الدهر مَيَّلَنِّي

سهمه سِطَا بالروح يومٍ طعنّا -- نيران غدره بالحشا ولّعنّي

يا طير قل لي وش حصل في زمنَّا -- كيف الذي يَظلم يعيش متهني

كيف الذي نِغْلِيه يَرخِص ثمنّا -- عن واجبه مَعْنا يِصِدّ و يِكِنِّي

حِنّا الخطأ يا طير نرفاه حِنّا -- و حِنّا على أحسن ظن دايم نِظِنِّي

لكن بعد ما زلّ زاد وغَبَنّا -- يوم ادّعى إن الجور يا طير مِنِّي

يا طير ، يا طير السَّعَد لا تَعنّا -- و أنا معك يا طير أعينك و أعِنِّي

خِذني معك يا طير لحظة تُونّا -- دامي معك يذهب غثا البال عَنِّي

و إن ردّد القُمْري لحونه و ثَنّى -- أردد الألحان بعده و أثَنِّي