قال الله وقال الرسـول

الشاعر / عبدالله الطلحي

ماكل دخان في المجلـس يجيلـه قبـول=من قال دخان عود الطيب مثـل البكـت
ولاكل قافٍ سمعته قلـت ليتـه يطـول=قيفـان ماهـزت إحساسـي ولاحركـت
ولاكل راعي سوالف ملتـزم بالأصـول=كم سالفة من خيـال الـراوي تفبركـت
يا مضحّك الناس مايطري عليك الفضول=الناس تضحك معك وإلا عليك إضحكـت
إن كان منته بقايل شـي يمـلا العقـول=الصمت خير إلك من ترديد بعض النكت
محدٍ بقايل لراعي الصمـت ليتـه يقـول=لكـن كـم قيـل للهراج ليتـه سـكـت
وياشاعرٍ صرت من دنيا الهوى في ذهول=دنيا الهوى شربكت دنيـاك وتشربكـت
ماتهرج إلا عن الفرقى وظلـم العـذول=وقلوب تشكي لها وقلوب منـك إشتكـت
لـو القصايـد تقـدم للقضايـا حـلـول=ماكل ساعة نزف جرحك وعينك بكـت
في سكة الوهم ماتلقى محطـة وصـول=كم ضيعت ناس قدامك ونـاس اهلكـت
قبلك ترانـا مشيناهـا طلـوع ونـزول=سقنا الركايب بدرب الجهل ليـن بركـت
حتى وصلنا بعد مرت علينـا الفصـول=لنهاية الصيف وايام الخريـف اوشكـت
من هرجنا ويش مكسبنا بعـد مانـزول=ياما حكينا ويامـا النـاس عنـا حكـت
والهرج من دون قال الله وقال الرسـول=جسمٍ بلا روح لـوإن العقـول أدركـت